យុទ្ធនាការ “គ្រួសារប្រពៃ កូនវៃឆ្លាត”
អន្តរាគមន៍សុខភាព ដើម្បីជួយគាំទ្រដល់ស្ត្រីមានផ្ទៃពោះ និងស្ត្រីជាម្តាយក្រោយសម្រាល ឲ្យមានសុខភាពកាន់តែប្រសើរ
រយៈពេល ១០០០ ថ្ងៃដំបូង មានសារៈសំខាន់បំផុតក្នុងជីវិតរបស់កុមារ ហើយមានឥទ្ធិពលលើសុខភាពក្នុងពេលអនាគតពេញមួយជីវិតរបស់ពួកគេ។ មូលដ្ឋានគ្រឹះនៃការចាប់ផ្តើមជីវិតប្រកបដោយសុខុមាលភាព គឺអាហារូបត្ថម្ភសម្រាប់ទាំងម្តាយនិងកូន។ អាហារូបត្ថម្ភរបស់ម្តាយមានសារៈសំខាន់សម្រាប់ម្តាយខ្លួនឯង ដើម្បីធានាថា គាត់មានសុខភាពល្អគ្រប់គ្រាន់ដើម្បីថែទាំខ្លួនឯង និងកូនរបស់គាត់ ។ អាហារូបត្ថម្ភក៏មានសារៈសំខាន់ផងដែរ សម្រាប់ទារកដែលបៅដោះ និងទទួលបានការថែទាំពីម្តាយ ក្នុងអំឡុងពេលដ៏សំខាន់បំផុតនេះ ។ នៅក្នុងផែនការយុទ្ធសាស្ត្រ ២០១៦-២០២០ របស់ក្រសួងសុខាភិបាល គោលដៅអភិវឌ្ឍន៍សុខភាពទីមួយគឺ ៖ “លើកកម្ពស់សុខភាពបន្តពូជ និងកាត់បន្ថយអត្រាស្លាប់របស់មាតា ទារក និងកុមារ និងកង្វះអាហារូបត្ថម្ភក្នុងចំណោមស្ត្រី និងកុមារតូចៗ” ។ កង្វះអាហារូបត្ថម្ភគឺជាបញ្ហាមួយចំពោះកុមារអាយុក្រោម ៥ ឆ្នាំនៅក្នុងគ្រួសារដែលមានប្រាក់ចំណូលទាប នៅទីជនបទនៃប្រទេសកម្ពុជា។ តាមរយៈការស្ទង់មតិប្រជាសាស្ត្រ និងសុខភាពកម្ពុជានៅទូទាំងប្រទេស ៣២% នៃកុមារអាយុក្រោម៥ឆ្នាំ មានបញ្ហាក្រេះក្រិន ។
ស្របតាមគោលដៅអភិវឌ្ឍន៍សុខភាពជាតិ គម្រោងលើកកម្ពស់ឥរិយាបថប្រកបដោយសុខុមាលភាព (PHB) ដែលផ្តល់មូលនិធិដោយ USAID កំពុងតែរៀបចំបង្កើនសកម្មភាពផ្លាស់ប្តូរឥរិយាបថសង្គម (SBC) ដើម្បីជួយគាំទ្រដល់ស្ត្រីមានផ្ទៃពោះ និងស្ត្រីជាម្តាយក្រោយសម្រាល ឲ្យមានសុខភាពកាន់តែប្រសើរ ។
ការអនុវត្ត
- ណែនាំអោយស្រ្តីដែលមានផ្ទៃពោះចាប់ពី៨ខែ ឲ្យស្គាល់ពីកម្មវិធីសារជាសំលេងតាមទូរស័ព្ទ (IVRs) ស្តីអំពីការគាំពារសុខភាពមាតានិងទារក
- ផ្តល់ការណែនាំឲ្យសុខភាពទាំងម្តាយនិងកូន កាន់តែប្រសើរឡើង
ក្រុមគោលដៅ
- ក្រុមគោលដៅចម្បង: ស្ត្រីមានផ្ទៃពោះ អំឡុងពេល៨ខែ និងស្ត្រីជាម្តាយក្រោយសម្រាល
- ក្រុមគោលដៅបន្ទាប់បន្សំ: អ្នកមានឥទ្ធិពល ដូចជា យាយ ឪពុក អ្នកមើលថែក្មេង និងមិត្តភក្តិ ព្រមទាំងឆ្មប
គោលបំណងឥរិយាបថ
- បំបៅដោះកូនដោយទឹកដោះម្តាយ ក្នុងម៉ោងដំបូងនៃកំណើត
- បំបៅដោះកូនដោយទឹកដោះម្តាយ តែមួយមុខគត់ រយៈពេល៦ខែដំបូងនៃអាយុ
- បន្តការបំបៅដោះកូនដោយទឹកដោះម្តាយ រហូតដល់កូនអាយុ២ឆ្នាំ
- ទៅមូលដ្ឋានសុខាភិបាល ជាមួយទារក ដើម្បីទទួលការថែទាំ ក្រោយសម្រាល យ៉ាងតិច៤ដង ក្នុង រយៈពេល ១០សប្តាហ៍ ក្រោយពេលសម្រាល
- ផ្តល់របបអាហារបន្ថែមដល់កុមារពីអាយុ៦ខែ ដល់២៣ខែ ដែលមានបរិមាណសមស្របតាមអាយុ ដោយមានអាហារចម្រុះ
យុទ្ធសាស្ត្រ និងសម្ភារជំនួយ
ចំនុចសំខាន់នៃយុទ្ធនាការនេះ គឺកម្មវិធីសារជាសំលេងតាមទូរស័ព្ទ (IVRs)។ នៅពេលដែលស្ត្រីចុះឈ្មោះ គាត់នឹងទទួលបានសារសំលេង ស្តីពីការថែទាំទារក និងរលឹកស្ត្រីជាម្តាយអំពីឥរិយាបថសុខភាពសំខាន់ៗ។ ចំនុចសំខាន់នៃយុទ្ធនាការនេះ គឺកម្មវិធីសារជាសំលេងតាមទូរស័ព្ទ (IVRs)។ នៅពេលដែលស្ត្រីចុះឈ្មោះ គាត់នឹងទទួលបានសារសំលេង ស្តីពីការថែទាំទារក និងរលឹកស្ត្រីជាម្តាយអំពីឥរិយាបថសុខភាពសំខាន់ៗ។ ស្ត្រីអាចប្រើប៊ូតុងដើម្បីរើសយកជម្រើសផ្សេងៗ ដូចជាស្តាប់សារឡើងវិញជាដើម។
យុទ្ធនាការ “គ្រួសារប្រពៃ កូនវៃឆ្លាត” ប្រើប្រាស់តួនាទីនៃគ្រួសារ មិនមែនមានតែម្តាយប៉ុណ្ណោះទេ ដែលមានតួនាទីបីបាច់ក្មេង។ យុទ្ធនាការនេះគូសបញ្ជាក់អំពីអ្នកលើកទឹកចិត្ត គឺគ្រួសារចង់ធ្វើអ្វីដែលជាការល្អសម្រាប់កូនៗ ដែលនាំឲ្យគេធំឡើងមានភាពឆ្លាតវៃ។ នៅក្នុងសារសុខភាព និមួយៗ មានព័ត៌មាន និងការណែនាំដ៏ត្រឹមត្រូវ និងទាន់ពេលវេលា ដែលទាក់ទងទៅនឹងជំហាននៅក្នុងអំឡុងពេលមានផ្ទៃពោះ និងក្រោយពេលសម្រាល។
សារជាសំលេងតាមទូរស័ព្ទ (IVRs): ដើម្បីផ្តល់ព័ត៌មាន និងរំលឹកម្តាយឱ្យអនុវត្តឥរិយាបថសំខាន់ៗ ទាំង៥
ផ្ទាំងរូបភាព (ចុះឈ្មោះក្រោយពេលសម្រាល): ដើម្បីលើកទឹកចិត្តស្ត្រីឱ្យសួរឆ្មបអំពីអត្ថប្រយោជន៍ដើម្បីជួយពួកគេចុះឈ្មោះ មុនពេលចាកចេញពីមន្ទីរពេទ្យជាមួយទារករបស់ពួកគេ ។
ស្ទីឃ័រទូរស័ព្ទ: ដើម្បីរំលឹកម្តាយអំពី IVRs និងឆ្លើយទូរស័ព្ទ ក៏ដូចជា ប្រាប់មិត្តភក្តិពួកគេឱ្យមកជួបឆ្មបដើម្បីចុះឈ្មោះ ។
សៀវភៅណែនាំអំពីការចុះឈ្មោះ: ដើម្បីជួយឆ្មបចុះឈ្មោះម្តាយដើម្បីទទួលសេវា IVR ។
ការតាមដាន វាយតម្លៃ និងសិក្សា
គម្រោង PHB ធ្វើការតាមដានការធ្វើអន្តរាគមន៍នេះ និងសកម្មភាពផ្លាស់ប្តូរឥរិយាបថដទៃទៀតរបស់គម្រោង ដោយប្រមូលទិន្នន័យសកម្មភាព ក្រុមគោលដៅ និងសម្ភារៈដែលបានចែកចាយ ព្រមទាំងព័ត៌មានអំពីចំណេះដឹង និងឥរិយាបថ របស់អតា្ថគាហក មុននិងក្រោយបានទំនាក់ទំនងជាមួយសកម្មភាពរបស់គម្រោង។ លទ្ធផលនិងមេរៀនដែលទទួលបាន នឹងយកទៅប្រើដើម្បីអនុវត្តគម្រោងបន្ត និងធ្វើអោយកាន់តែមានភាពប្រសើរឡើង នូវសកម្មភាពផ្លាស់ប្តូឥរិយាបថរបស់គម្រោង ព្រមទាំងចែកចាយជាប្រចាំ ទៅសហគមន៍នៃអ្នកធ្វើការផ្នែកផ្លាស់ប្តូរឥរិយាបថ។
* គម្រោងលើកកម្ពស់ឥរិយាបថប្រកបដោយសុខុមាលភាព (PHB) គឺជាគម្រោងផ្លាស់ប្តូរឥរិយាបថបុគ្គលនិងសង្គម ដែលចាប់ផ្តើមអនុវត្តក្នុងឆ្នាំ២០១៨ ឧបត្ថម្ភថវិកាដោយទីភ្នាក់ងារជំនួយអាមេរិក USAID ។ គោលដៅរបស់គម្រោងនេះ គឺដើម្បីធ្វើឲ្យប្រសើរឡើង នូវឥរិយាបថសុខភាពក្នុងចំណោមប្រជាជនកម្ពុជា និងធានាឲ្យបានថា ប្រជាជនកម្ពុជាស្វែងរក និងទទួលបានសេវាសុខភាព ដែលប្រកបដោយគុណភាព ដោយកាត់បន្ថយឧបសគ្គផ្នែកហិរញ្ញវត្ថុ ។ ដំបូងឡើយ គម្រោង PHB ផ្តោតទៅលើវិស័យសុខភាពធំៗចំនួន៦គឺ៖ សុខភាពមាតានិងទារក អាហារូបត្ថម្ភ ទឹកស្អាតនិងអនាម័យ ការពន្យារកំណើត ជំងឺរបេង និងជំងឺគ្រុនចាញ់។ ក្នុងឆ្នាំ២០២០ និង ២០២១ គម្រោង PHB បានអនុវត្តសកម្មភាពទាក់ទងនឹងជំងឺកូវីដ-១៩ ដើម្បីឆ្លើយតបនឹងការរីករាលដាលនៃជំងឺនេះ ។ នៅចុងឆ្នាំ២០២១ ជំងឺមិនឆ្លង ត្រូវបានដាក់បញ្ចូលទៅក្នុងសកម្មភាពរបស់គម្រោង ហើយរយៈពេលរបស់គម្រោងត្រូវបានបន្ត ដល់ឆ្នាំ២០២៥ ។
