ស្ថាប័ន្ធពាក់ព័ន្ធរួមគ្នាកំណត់អាទិភាព ដើម្បីដោះស្រាយបញ្ហា AMR
ភាពសុំានឹងឱសថប្រឆាំងមេរោគ ឬ AMR បង្កឡើងដោយសារលទ្ធភាពរបស់អតិសុខុមកាយវិវត្ដទៅជាស៊ាំទៅនឹងឱសថសង្រ្គោះជីវិតជាច្រើនប្រភេទដែលប្រើសម្រាប់ប្រឆាំងនឹងជំងឺឆ្លង ធ្វើឲ្យឱសថទាំងនោះបាត់បង់ប្រសិទ្ធិភាពក្នុងការបង្ការ និងព្យាបាលរោគដែលបង្កឡើងដោយបាក់តេរី វីរុស បារ៉ាស៊ីត និងផ្សិតទាំងនោះ។
ភាពសុំានឹងឱសថប្រឆាំងមេរោគ ឬ AMR ត្រូវបានចាត់ទុកដោយអង្គការសុខភាពពិភពលោក (WHO) ជាការគំរាមកំហែងមួយចំពោះសុខភាព និងការអភិវឌ្ឍន៍នៅក្នុងពិភពលោក ប៉ុន្តែមានមនុស្សជាច្រើននាក់ មិនបានយល់ច្បាស់ពីហានិភ័យ ដែលបង្កឡើងដោយ AMR ទេ។ តាមការសិក្សាស្រាវជ្រាវថ្មីៗនេះ បានបង្ហាញអោយឃើញថា ក្នុងឆ្នាំ២០១៩ ភាពសុំានឹងឱសថប្រឆាំងមេរោគ ឬ AMR បានបណ្តាលឲ្យមានមនុស្សស្លាប់ ១,២៧ លាននាក់ក្នុងសកលលោក ដែលតួលេខនេះមានចំនួនច្រើនជាងអ្នកស្លាប់ដោយសារជំងឺអេដស៍និងគ្រុនចាញ់ទៅទៀត។
ឯកឧត្តមវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង ថ្លែងសុន្ទរកថាបើកសិក្ខាសាលា។
នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាលកំពុងដើរតួនាទីយ៉ាងសំខាន់ក្នុងការលើកកម្ពស់ការយល់ដឹង និងបង្កើនកិច្ចសហការគ្នា ដើម្បីដោះស្រាយបញ្ហាភាពសុំានឹងឱសថប្រឆាំងមេរោគ ដោយបានរៀបចំសិក្ខាសាលា នៅថ្ងៃទី១៦-១៧ ខែឧសភា ឆ្នាំ២០២២ ក្នុងខេត្តកំពង់ចាម ស្តីពី “ការកំណត់យុទ្ធសាស្ត្រដើម្បីទប់ស្កាត់នូវភាពស៊ាំនឹងឱសថប្រឆាំងមេរោគ នៅក្នុងប្រទេសកម្ពុជា” ក្រោមអធិបតីឯកឧត្តមវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង។ សិក្ខាសាលានេះ មានអ្នកចូលរួមចំនួន៦០នាក់ ពីនាយកដ្ឋានផ្សេងៗនៃក្រសួងសុខាភិបាល សមាជិកក្រុមការងារបច្ចេកទេស AMR និងដៃគូអភិវឌ្ឍន៍ផ្សេងៗ ក្នុងគោលបំណងបង្កើនការយល់ដឹងរួមគ្នាក្នុងចំណោមអ្នកពាក់ព័ន្ធសំខាន់ៗ រួមមានការសម្រេចបាន ក្នុងការប្រយុទ្ធប្រឆាំងនឹង AMR និងកំណត់អាទិភាព ដែលស្ថាប័ន្ធពាក់ព័ន្ធអាចធ្វើការសហការគ្នា ដើម្បីដោះស្រាយបញ្ហា AMR ក្នុងប្រទេសកម្ពុជា។
នៅក្នុងសុន្ទរកថាបើកសិក្ខាសាលា ឯកឧត្តមវេជ្ជបណ្ឌិត លី សូវ៉ាន់ បានលើកអំពីការខ្វះខាតទិន្នន័យនិងព័ត៌មានវិទ្យាសាស្រ្ត ដែលជាឧបសគ្គក្នុងការបង្កើតដំណោះស្រាយ និងស្វែងរកការគាំទ្រដល់កិច្ចការស្តីពីភាពសុំានឹងឱសថប្រឆាំងមេរោគ ឬ AMR នេះ។ ឯកឧត្តមក៏បានគូសបញ្ជាក់ពីសារៈសំខាន់នៃការអប់រំ ទាំងអ្នកផ្តល់សេវាសុខភាពនិងប្រជាជនទូទៅ អំពីការប្រើប្រាស់ឱសថប្រឆាំងមេរោគត្រឹមត្រូវ និងហានិភ័យនៃភាពសុំានឹងឱសថទាំងនេះ ដោយលើកឧទាហរណ៍ជាក់ស្តែងពីជោគជ័យនៃការប្រយុទ្ធនឹងកូវីដ-១៩ ដែលមានការចូលរួមយ៉ាងសស្រាក់សស្រាំក្នុងការអប់រំអំពីវិធានការការពារនិងចាក់វ៉ាក់សាំង ធ្វើឲ្យកម្ពុជាស្ថិតក្នុងបណ្តាប្រទេសឈានមុខគេក្នុងការប្រយុទ្ធប្រឆាំងនឹងជំងឺកូវីដ-១៩។ សម្រាប់បញ្ហា AMR យើងក៏អាចសម្រេចលទ្ធផលបានយ៉ាងវេជ្ជមាន ប្រសិនបើមានការសហការល្អ។
សិក្ខាសាលាស្តីពី “ការកំណត់យុទ្ធសាស្ត្រដើម្បីទប់ស្កាត់នូវភាពស៊ាំនឹងឱសថប្រឆាំងមេរោគ នៅក្នុងប្រទេសកម្ពុជា” ត្រូវបានធ្វើឡើងនៅថ្ងៃទី១៦-១៧ ខែឧសភា ឆ្នាំ២០២២ ក្នុងខេត្តកំពង់ចាម។
លោកស្រី ជី សុជាតិ នាយិកាប្រចាំប្រទេសនៃអង្គការ PSI Cambodia ឡើងសំដែងចំណាប់អារម្មណ៍ នៅក្នុងសិក្ខាសាលា។
ដូចច្នេះហើយទើបឯកឧត្តមវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង បានលើកទឹកចិត្តឲ្យមានការចូលរួមពីអង្គការដៃគូផ្សេងៗនៅក្នុងកិច្ចប្រឹងប្រែងប្រយុទ្ធប្រឆាំងនឹងភាពសុំានឹងឱសថប្រឆាំងមេរោគ ដែលកន្លងមកមានទីភ្នាក់ងារ US-CDC និងអង្គការ WHO ហើយថ្មីៗនេះក៏មានការចូលរួមរបស់អង្គការ PSI ដែលបានឧបត្ថម្ភដល់សិក្ខាសាលានេះ និងធ្វើយុទ្ធនាការអប់រំផ្សេងៗ។ ឯកឧត្តមសង្ឃឹមថានឹងមានដៃគូអភិវឌ្ឍន៍ផ្សេងៗទៀតចូលរួមក្នុងកិច្ចការប្រយុទ្ធប្រឆាំងនឹងភាពសុំានឹងឱសថប្រឆាំងមេរោគនេះ ក្នុងពេលអនាគត។