មន្ទីរពេទ្យបង្អែកតូច តែមានចក្ខុវិស័យធំ
ការបង្កើនការប្រើប្រាស់ប្រព័ន្ធផ្តល់ព័ត៌មានត្រឡប់ជាប្រចាំពីអតិថិជនដែលមកទទួលសេវាសុខាភិបាលនៅមន្ទីរពេទ្យ
យ៉ាងហោចណាស់ អតិថិជន ៥ទៅ១០នាក់ ក្នុងមួយថ្ងៃ (ជាង២០០នាក់ក្នុង១ខែ) បានផ្តល់មតិអំពីសេវាសុខាភិបាល នៅមន្ទីរពេទ្យបង្អែកសំពៅលូន ។ (Photo by Savann Oeurm/USAID-EQHA-FHI 360)
មតិយោបល់របស់អតិថិជនដែលមកទទួលសេវាសុខាភិបាល ពិតជាមានសារៈសំខាន់ និងជាវិធីមួយដ៏ល្អ ដើម្បីឆ្លុះបញ្ចាំងគុណភាពនៃសេវាសុខាភិបាលនៅមន្ទីរពេទ្យ និងផ្តល់នូវភស្តុតាង ដើម្បីកំណត់ចំនុចដែលត្រូវកែលម្អ។ ការសូមឲ្យផ្តល់មតិយោបល់បែបអនាមិក ដោយប្រើប្រាស់បច្ចេកវិទ្យាទំនើប ក៏បានបណ្ដុះការជឿទុកចិត្តរបស់សាធារណជន ចំពោះមន្ទីរពេទ្យ និងប្រព័ន្ធថែទាំសុខាភិបាល។
មន្ទីរពេទ្យបង្អែកសំពៅលូន បានទទួលជំនួយបច្ចេកទេស ពីគម្រោង USAID EQHA និងក្រុមការងារកែលម្អគុណភាពសេវាសុខាភិបាល (QI) នៃមន្ទីរសុខាភិបាល ដើម្បីដាក់ដំណើរសាកល្បងនូវប្រព័ន្ធផ្តល់ព័ត៌មានត្រឡប់ជាប្រចាំពីអតិថិជនដែលមកទទួលសេវាសុខាភិបាល ចាប់តាំងពីខែមេសា ឆ្នាំ២០២១។ ពីមុនមក មន្ទីរពេទ្យនេះបានប្រមូលមតិអតិថិជន ដោយប្រើវិធីបូរាណ គឺដោយប្រើទំរង់ជាក្រដាស ហើយការប្រើប្រាស់ទំរង់នេះគឺមានកំរិតទាប។ លោកគ្រូពេទ្យ ពូន សម្បត្តិ ប្រធានមន្ទីរពេទ្យបង្អែកសំពៅលូន បានប្រាប់ឲ្យដឹងអំពីឧបសគ្គជាច្រើន ដោយរួមមានអតិថិជនមិនបានដឹងអំពីទំរង់នេះ ការបំពេញទំរង់និងវិភាគមតិដែលទទួលបានត្រូវការចំណាយពេលច្រើន ព្រមទាំងអនក្ខរកម្មនៃអតិថិជនខ្លះ ផងដែរ។ ប្រព័ន្ធអេឡិចត្រូនិកដែលងាយស្រួលប្រើ រហ័ស និងមានសំលេង បានដាក់ឲ្យប្រើប្រាស់ដើម្បីឆ្លើយតបនឹងឧបសគ្គទាំងនេះ និងដើម្បីបូលរួមនឹងសំលេងរបស់អតិថិតជនក្នុងការលើកកម្ពស់សេវាសុខាភិបាល។
ដោយមានជំនួយពីគម្រោង EQHA និងមន្ទីរសុខាភិបាល ក្រុមការងារ QI នៃមន្ទីរពេទ្យបង្អែកសំពៅលូន បានបង្កើតគំនិតដើម្បីធ្វើឲ្យមានការផ្លាស់ប្តូរ និងប្រើប្រាស់វិធីសាស្រ្ត ធ្វើផែនការ – អនុវត្តផែនការ – សិក្សាលើការអនុវត្ត – ចាត់វិធានការបន្ទាប់ (PDSA) ដើម្បីសាកល្បងការផ្លាស់ប្តូរទាំងនោះ។ បទពិសោធន៍ប្រកបដោយភាពច្នៃប្រឌិតជាច្រើន ត្រូវបានអនុវត្ត តាំងពីខែសីហា ឆ្នាំ២០២១ ដើម្បីសម្របសម្រួលការប្រើប្រាស់ប្រព័ន្ធផ្តល់ព័ត៌មានត្រឡប់ជាប្រចាំពីអតិថិជនដែលមកទទួលសេវាសុខាភិបាលនៅមន្ទីរពេទ្យ (PSF) ។
ទីមួយ បុគ្គលិកមន្ទីរពេទ្យទាំងអស់ត្រូវបានណែនាំឲ្យចេះប្រើ PSF ហើយពួកគាត់ត្រូវបានកំណត់ក្នុងការណែនាំប្រព័ន្ធនេះទៅកាន់អតិថិជន។ ទី២ PSF ត្រូវបានបញ្ជូលទៅក្នុងការអនុវត្តរំហូរអ្នកជំងឺ (patient flow) និងតារាងរំហូរនេះ ត្រូវបានដាក់តាំងនៅទីកន្លែងរង់ចាំផងដែរ។ ទី៣ អតិថិជនទាំងអស់ត្រូវបានណែនាំឲ្យចេះប្រើប្រាស់ PSF tablet ដោយមិនមានការឥទ្ធិពលពីបុគ្គលិកមន្ទីរពេទ្យ។ លើពីនេះទៅទៀត ក្រដាសបិទនៅលើឯកសាររបស់អតិថិជន ត្រូវបានប្រើប្រាស់ ដើម្បីកំណត់អតិថិជនដែលបានបំពេញ PSF រួចរាល់ និងដើម្បីលើកទឹកចិត្តអតិថិជនផ្សេងទៀត ឲ្យបំពេញដែរ។ ទិន្នន័យ PSF ត្រូវបានយកទៅបង្ហាញជារៀងរាល់ខែ ក្នុងពេលប្រជុំបុគ្គលិកមន្ទីរពេទ្យ ដើម្បីកំណត់ចំនុចដែលមន្ទីរពេទ្យត្រូវកែលម្អ។
ដូចច្នេះហើយ ការប្រើប្រាស់ PSF មានការកើនឡើងពី ២,១% នៅក្នុងខែមេសា ឆ្នាំ២០២១ ទៅដល់ ៧២,៩% នៅក្នុងខែធ្នូ ឆ្នាំ២០២១។ ប៉ុន្តែ ចំនួននេះបានធ្លាក់វិញ ដោយសារតែមានវិបត្តិជំងឺកូវិដ-១៩ ប៉ុនតែជាចុងក្រោយ ការប្រើប្រាស់ក៏ចាប់កើនឡើងវិញ ដោយឈានទៅដល់ ៤៧,៣% នៅក្នុងខែសីហា ឆ្នាំ២០២២។
បើប្រៀបធៀបទិន្នន័យដែលប្រមូល អាត្រានៃអ្នកជំងឺដែលរាយការណ៍ថា “ពេញចិត្តខ្លាំង” ឬ “ពេញចិត្ត” អំពីសេវាដែលពួកគេទទួលបាន គឺមាន៨២ភាគរយ ក្នុងខែមិថុនា និង ៩៦ភាគរយ ក្នុងខែសីហា ឆ្នាំ២០២២។ ចំណែកគុណភាពនៃការប្រឹក្សា គឺ៨១ភាគរយ ក្នុងខែមិថុនា និង៩៧ភាគរយ ក្នុងខែសីហា។ ភាពស្អាតនិងអនាម័យ ទួលបាន៧៩ភាគរយក្នុងខែមិថុនា និង៩៦ភាគរយ ក្នុងខែសីហា។ លើសពីនេះទៅទៀត អ្នកជំងឺចំនួន៨៦ភាគរយ ក្នុងខែមិថុនា និង៨៩ភាគរយ ក្នុងខែសីហា បានឲ្យដឹងថា រយៈពេលរង់ចាំគឺជាមធ្យម៣០នាទី។ អ្នកជំងឺ ៩៩ភាគរយ ក្នុងខែសីហាបាន រាយការណ៍ថា ពួកគាត់មករកសេវានៅមន្ទីរពេទ្យនេះ និងមានបំណងណែនាំអំពីមន្ទីរពេទ្យសំពៅលូន ទៅដល់មិត្តភក្តិនិងគ្រួសាររបស់គេ។
ក្រុមការងារ QI នៃមន្ទីរពេទ្យបង្អែកសំពៅលូន បានបង្ហាញចំណាប់អារម្មណ៍ក្នុងការប្រើវិធីសាស្ត្រ QI ដើម្បីបន្តការកែលម្អសេវា និងសម្រេចបានគោលដៅការប្រើប្រាស់ SPF ឲ្យបាន៥៥ភាគរយ។ លោកវឌ្ឍនៈ អនុប្រធានផ្នែកជំងឺទូទៅ បាននិយាយថាអ្នកជំងឺសប្បាយរីករាយជាងមុនជាមួយនឹងសេវាមន្ទីរពេទ្យ ហើយជំនួនអ្នកដែលមកប្រើសេវាក៏បានកើនឡើងផងដែរ។ បច្ចុប្បន្ន ផ្នែកជំងឺទូទៅបានរាយការណ៍ ថាស្ទើរតែមានអ្នកមកទទួលសេវាពេញទៅហើយ។ មន្ទីរពេទ្យបង្អែកសំពៅលូន គឺជាមន្ទីរពេទ្យនៅថ្នាក់ស្រុកដ៏តូចពិតមែន តែមានចក្ខុវិស័យធំ ដើម្បីខិតខំប្រើប្រាស់វិធីសាស្ត្រ QI ដើម្បីលើកកម្ពស់សេវាសុខភាពដល់សហគមន៍។
សម្រង់មតិខ្លះៗអំពីប្រព័ន្ធផ្តល់ព័ត៌មានត្រឡប់ជាប្រចាំពីអតិថិជន:
“ទិន្នន័យ PSF មានអត្ថប្រយោជន៍សម្រាប់បុគ្គលិកមន្ទីរពេទ្យ ក្នុងការផ្លាស់ប្តូរនិងកែលម្អសេវាសុខភាព និងជាការលើកទឹកចិត្តដល់ពួកគាត់ដើម្បីផ្តល់សេវាដ៏ល្អ។” — លោកវឌ្ឍនៈ អនុប្រធានផ្នែកជំងឺទូទៅ
“ការប្រើប្រព័ន្ធឌីជីថលនេះ ធ្វើឲ្យមានភាពងាយស្រួល ជាងការសរសេរដាក់ក្រដាស និងអាចឲ្យខ្ញុំបង្ហាញអំពីមតិរបស់ខ្ញុំចំពោះសេវា ការប្រឹក្សា និងអនាម័យ ដោយពុំមានការភ័យខ្លាច” — អ្នកជំងឺម្នាក់
“បច្ចុប្បន្ននេះ ផ្នែកជំងឺទូទៅស្ទើរតែពេញទៅហើយ ហើយអ្នកជំងឺរីករាយនឹងមកទទួលសេវានៅមន្ទីពេទ្យ។” — លោកវឌ្ឍនៈ អនុប្រធានផ្នែកជំងឺទូទៅ
“យើងដឹងថាការបំពេញការស្ទង់មតិតាមប្រព័ន្ធនេះ គឺធ្វើដោយការស្ម័គ្រចិត្ត ប៉ុន្តែយើងមិនដែលមានអ្នកជំងឺណាម្នាក់បដិសេធមិនបំពេញនោះទេ។” — លោកវឌ្ឍនៈ អនុប្រធានផ្នែកជំងឺទូទៅ
