“ការមានកូនត្រូវការចំណាយច្រើន!”
សុគន្ធ និងយ៉េន រស់នៅក្នុងភូមិក្រាំងស្គារ ក្នុងខេត្តកំពង់ឆ្នាំង ដោយមានកូនប្រុសម្នាក់ អាយុ៦ខែ ឈ្មោះមិនា ។ សុគន្ធ ជាបុរសស្ងៀមស្ងាត់ ក្នុងវ័យ២៧ឆ្នាំ និងមានមុខរបរជាកសិករ ដែលមានស្រែនៅជិតផ្ទះរបស់គាត់ ។ ចំណែកប្រពន្ធរបស់គាត់វិញ គឺលោកស្រីយ៉េន មានអាយុ២៧ឆ្នាំ ហើយគាត់តែងតែចំណាយពេលដើម្បីមើលថែកូនរបស់គាត់ “មិនា” ដែលជាទារកដែលចូលចិត្តលេង និងត្រូវការការមើលថែច្រើន ។ គ្រួសារដែលមានសមាជិក៣នាក់នេះ រស់នៅដោយសាមញ្ញ ហើយពួកគាត់មានផ្ទះខ្លួនឯងមួយ ដែលមានការរៀបចំយ៉ាងមានរបៀបរៀបរយ ដោយមានវាលស្រែនៅជុំវិញ និងមានផ្ទះអ្នកជិតខាង៤ ឬ៥ ខ្នង នៅក្បែៗនោះ ដែលតែងតែមកលេងជាមួយទារក មិនា ជាញឹកញាប់ ។
គូស្វាមីទាំងពីរនាក់បានត្រូវអញ្ជើញមកចូលរួមវគ្គផ្សព្វផ្សាយអំពីការពន្យារកំណើតមួយ ដោយអនុភូមិ កាលពី៦ខែមុន បន្ទាប់ពីបន្ទាប់ពីមានកូនដំបូងរបស់គាត់ គឺមិនា។ វគ្គនេះត្រូវបានរៀបចំឡើងដោយគម្រោងលើកកម្ពស់ឥរិយាបថប្រកបដោយសុខុមាលភាព ដែលជាគម្រោងផ្លាស់ប្តូរឥរិយាបថបុគ្គលនិងសង្គម ឧបត្ថម្ភថវិកាដោយទីភ្នាក់ងារសហរដ្ឋអាមេរិកសំរាប់អភិវឌ្ឍន៍អន្តរជាតិ (USAID)។ ពួកគាត់បាននិយាយថា ទោះបីជាពួកគាត់បានពិភាក្សានិងសម្រេចថា ៣ឆ្នាំក្រោយ គាត់ចង់បានកូនមួយទៀត ពួកគាត់មិនមានចំណេះដឹងគ្រប់គាន់ទាក់ទងនឹងការពន្យារកំណើតបែបទំនើប ហើយមិនប្រាកដក្នុងទៅលើប្រសិទ្ធិភាពនៃមធ្យោបាយនេះទេ។ ប៉ុន្តែអ្នកស្រីយ៉េន ក៏បានមានក្តីបារម្ភអំពីការមានផ្ទៃពោះដែលមិនបានគ្រោងទុកផងដែរ។ គាត់បាននិយាយថា “ការចិញ្ចឹមកូនគឺត្រូវការចំណាយលុយនិងពេលវេលាច្រើន” ។
នៅក្នុងវគ្គនោះ សុគន្ធនិងយ៉េន បានយល់ដឹងអំពីមធ្យោបាយពន្យារកំណើតផ្សេងៗ និងព័ត៌មានលំអិត ដូចជាប្រសិទ្ធិភាព និងផលរំខាន ព្រមទាំងការយល់ខុសផ្សេងៗអំពីការពន្យារកំណើត។ ការយល់ខុសទាំងនេះត្រូវបានលើកយកមកពិភាក្សា និងបកស្រាយ នៅក្នុងការលេងល្បែង “ពិត ឬមិនពិត” នៅក្នុងវគ្គនោះ។ យ៉េន បាននិយាយថាភ្នាក់ងារអប់រំសុខភាពរបស់គម្រោង បានចុះមកផ្ទះរបស់គាត់ចំនួន៤ដង បន្ទាប់ពីគាត់បានចូលរួមវគ្គនោះ ដោយបានផ្តល់ឲ្យគាត់នូវព័ត៌មានបន្ថែមដើម្បីដោះស្រាយក្តីបារម្ភនិងចម្ងល់របស់គាត់។
បន្ទាប់ពីបានចូលរួមវគ្គអប់រំសុខភាពនេះមក គូស្វាមីភរិយានេះ ពិភាក្សានិងសម្រេចរួមគ្នាថា ថ្នាំចាក់ពន្យារកំណើត រៀងរាល់៣ខែម្តង គឺជាជម្រើសដ៏ល្អសម្រាប់ពួកគាត់។ ទោះបីជាយ៉ាងណាក៏ដោយ យ៉េនមានការព្រួយបារម្ភថាការចាក់ថ្នាំអាចប៉ះពាល់ដល់ទឹកដោះ ព្រោះគាត់នៅបំបៅមិនានៅឡើង។ ភ្នាក់ងារអប់រំរបស់គម្រោងបានបកស្រាយពន្យល់ ក្នុងអំឡុងពេលដែលក្រុមការងារបានចុះទៅតាមផ្ទះរបស់គាត ទើបពួកគាត់អស់ក្តីបារម្ភវិញ និងរីករាយចំពោះការសម្រេចចិត្តរបស់ខ្លួន។
លោកស្រី យ៉េន បាននិយាយថា “ពួកយើងមានភាពងាយស្រួលក្នុងការពិភាក្សាគ្នាអំពីជម្រើសនៃការពន្យារកំណើត បន្ទាប់ពីបានទទួលចំណេះដឹងពីភ្នាក់ងារអប់រំរបស់គម្រោង ដូចជាពិភាក្សាអំពីប្រសិទ្ធិភាពនិងអត្ថប្រយោជន៍នៃមធ្យោបាយពន្យារកំណើតនិមួយៗ។” លើសពីនេះទៅទៀត នៅពេលដែលក្រុមការងារគម្រោងសាកសួរអំពីឥទ្ធិពលនៃគម្រោងនេះ ចំពោះគ្រួសាររបស់គាត់ គូស្វាមីភរិយាទាំងពីរបានប្រាប់ឲ្យដឹងថា ពួកគាត់បានដឹងអំពីសារៈសំខាន់នៃការមានធនធានគ្រប់គ្រាន់ ដើម្បីថែរក្សាកូនប្រុស “មិនា” របស់គាត់ ហើយមធ្យោបាយពន្យារកំណើតទំនើប អាចជួយធានាថាពួកគាត់មានធនធានទាំងនេះ។ ពួកគាត់ជឿជាក់ថា មធ្យោបាយពន្យារកំណើតទំនើបមានសារៈសំខាន់ ហើយដៃគូគ្រប់រូបគួរស្គាល់មធ្យោបាយទាំងនេះ ដោយសារវាអាចរក្សារគុណភាពនៃជីវិត និងសមត្ថភាពនៃគ្រួសារក្នុងការផ្តល់ការថែទាំល្អដល់កូនៗខ្លួន។
ខ្ញុំនិងប្តីរបស់ខ្ញុំមានការបារម្ភ នឹងការមានកូនដោយមិនបានគ្រោងទុក ពីព្រោះការចិញ្ចឹមបីបាច់កូនគឺត្រូវការចំណាយលុយនិងពេលវេលាច្រើន។ ការស្វែងយល់អំពីមធ្យោបាយពន្យារកំណើតបែបទំនើប បានជួយដល់ពួកខ្ញុំច្រើន។ មធ្យោបាយបែបទំនើបជួយដល់ពួកយើង ក្នុងការមានពេលវេលានិងធនធានបន្ថែមក្នុងការមើលថែកូន មិនា ដែលទើបមានអាយុ៦ខែ។
