បង្កើនសមត្ថភាពនៃការស្វែងរកការគាំទ្រផ្នែកលើកកម្ពស់សុខភាព
ការមានផែនការការគាំទ្រ (advocacy plan) មានសារៈសំខាន់ណាស់ដើម្បីអោយ ស្ថាប័ន មួយឈានទៅរកភាពជោគជ័យ។ ចំពោះកិច្ចប្រឹងប្រែងក្នុងការលើកកម្ពស់សុខភាព ការមានផែនការស្វែងរកការគាំទ្រដែលរឹងមាំ មានឥទ្ធិពលដល់ការទំនាក់ទំនងជាមួយអ្នកដែលមានសិទ្ធិសម្រេចចិត្តសំខាន់ៗ ដើម្បីទទួលបានការគាំទ្រដល់កម្មវិធីសុខាភិបាល និងធ្វើអោយអ្នកទាំងនោះវិនិយោគពេលវេលាដ៏មមាញឹក និងបែងចែកថវិកាកម្មវិធី ដើម្បីធ្វើអោយប្រជាជនកម្ពុជាបានទទួលព័ត៌មាននិងមានធនធានគ្រប់គ្រាន់អាចអោយពួកគេរស់នៅប្រកបដោយសុខុមាលភាព និងសម្រេចបានគោលបំណងសុខភាពរបស់ខ្លួន។
លោកស្រី ជី សុជាតិ នាយិកាប្រចាំប្រទេសនៃអង្គការ PSI ដែលបានដឹកនាំសិក្ខាសាលាស្តីពី”យុទ្ធសាស្ត្រស្វែងរកការគាំទ្រ” សម្រាប់អ្នកជំនាញផ្នែកលើកកម្ពស់សុខភាព បានមានប្រសាសន៍ថា ការស្វែងរកការគាំទ្រមិនមែនជាទំនាក់ទំនងសាធារណៈ ទេ ហើយវាក៏មិនមែនជាផ្នែកទីផ្សារដែរ។ លោកស្រីបានមានប្រសាសន៍អោយងាយយល់ថា “ការស្វែងរកការគាំទ្រគឺជាទំនាក់ទំនងផ្លាស់ប្តូរឥរិយាបថ សម្រាប់ថ្នាក់ធ្វើសេចក្ដីសម្រេច”។ សិក្ខាសាលាដែលមានរយៈពេល២ថ្ងៃនេះ ជាផ្នែកមួយនៃគម្រោងPHB និង ត្រូវបានរៀបចំធ្វើឡើង ដោយអង្គការអន្តរជាតិបំរើសុខភាពប្រជាជន (PSI) នៅថ្ងៃទី២៣-២៤ ខែមិថុនា ឆ្នាំ២០២០។ អ្នកចូលរួមរួមមានតំណាងពីដៃគូរដ្ឋាភិបាល និងអង្គការ ដូចជាផ្នែកលើកកម្ពស់សុខភាពនៃមន្ទីរសុខាភិបាលខេត្តបាត់តំបងនិងខេត្តកំពង់ឆ្នាំង អង្គការដៃគូផ្តល់មេត្តា (PC) និងអង្គការសកម្មភាពដើម្បីអភិវឌ្ឍន៍សុខភាព (AHEAD)។
សិក្ខាកាមបានពិភាក្សាអំពីគោលបំណងយូរអង្វែង និងអ្នកដែលអាចជួយអោយគោលបំណងរបស់ខ្លួនបានជោគជ័យព្រមទាំងបានទទួលមតិពីសិក្ខាកាមដទៃទៀត អំពីកត្តាសំខាន់ៗដែលត្រូវពិចារណាសម្រាប់ផែនការស្វែងរកការគាំទ្ររបស់ខ្លួន ដូចជាបុគ្គលិក ថវិកា ពេលវេលា ។ល។ សិក្ខាសាលានោះ ក៏ បានលើកឡើងអំពី Smart Chart ដែលជាជំនួយ៦ជំហាន សម្រាប់ការធ្វើការផែនការស្វែងរកការគាំទ្រដោយជួយអោយជំរើសសារ និងក្រុមគោលដៅ មានលក្ខណៈស្របគ្នាហើយយុទ្ធសាស្ត្រអាចសម្រេចទៅបាន។
លោកស្រី វណ្ណ ម៉ាដែត ដែលជាប្រធានផ្នែកលើកកម្ពស់សុខភាពនៃមន្ទីរសុខាភិបាលខេត្តបាត់តំបង ហើយដែលជាសិក្ខាកាមម្នាក់ក្នុងចំណោមទាំង១០រូប មកពីខេត្តបាត់តំបង កំពង់ឆ្នាំង និងភ្នំពេញ បានមានប្រសាសន៍ថា នេះជាលើកតំបូងហើយដែលលោកស្រីបានចូលរួមសិក្ខាសាលាក្នុងប្រធានបទនេះ។ លោកស្រីបានបន្ថែមថា “សិក្ខាសាលានេះមានសារៈសំខាន់ក្នុងការធ្វើអោយសកម្មភាពរបស់ផ្នែកលើកកំពស់សុខភាពអោយកាន់តែល្អជាងមុន និងជួយដល់ការទទួលការគាំទ្របន្ថែមពីថ្នាក់ដឹកនាំ។”
ដោយទទួលបានមតិវិជ្ជមានជាច្រើនពីអ្នកចូលរួម គម្រោង PHB នឹងពង្រីកសិក្ខាសាលានេះទៅកាន់ដៃគូក្នុងខេត្តដទៃទៀត ដែលគម្រោងនេះកំពុងអនុវត្ត។
គម្រោងលើកកម្ពស់ឥរិយាបថប្រកបដោយសុខុមាលភាព (PHB) គឺជាគម្រោងផ្លាស់ប្តូរឥរិយាបថបុគ្គលនិងសង្គម ដែលមានរយៈពេល៥ឆ្នាំ ឧបត្ថម្ភមូលនិធិដោយ USAID (២០១៨-២០២៣) ដែលអនុវត្តផ្ទាល់ ដោយអង្គការអន្តរជាតិបំរើសុខភាពប្រជាជន (PSI)។ គោលដៅរបស់គម្រោង PHB គឺដើម្បីធ្វើអោយប្រសើរឡើង នូវឥរិយាបថសុខភាពក្នុងចំណោមប្រជាជនកម្ពុជា និងធានាឲ្យបានថា ប្រជាជនកម្ពុជាស្វែងរក និងទទួលបានសេវាសុខភាពដែលប្រកបដោយគុណភាព ដោយមានការកាត់បន្ថយបន្ទុកផ្នែកហិរញ្ញវត្ថុ។ គម្រោង PHB ផ្តោតទៅលើវិស័យសុខភាពធំៗចំនួន៦គឺ៖ សុខភាពមាតានិងទារក អាហារូបត្ថម្ភ ការពន្យារកំណើត ទឹកស្អាតនិងអនាម័យ ជំងឺរបេង និងជំងឺគ្រុនចាញ់។ គម្រោង PHB ធ្វើការជាមួយដៃគូ នៅក្នុងរាជធានីភ្នំពេញ ខេត្ត្កំពង់ឆ្នាំង កំពង់ចាម ត្បូងឃ្មុំ បាត់តំបង និងប៉ៃលិន។
