គម្រោងជំងឺទឹកនោមផ្អែមលើកុមារ (CDiC)

ជំងឺទឹកនោមផ្អែមប្រភេទ១ គឺជាប្រភេទជំងឺ autoimmune disease ដែលអ្នកជំងឺត្រូវរស់នៅជាមួយជំងឺនេះពេញមួយជីវិត ។ ជំងឺនេះបណ្តាលឱ្យរាងកាយមិនអាចផលិតអាំងស៊ុយលីនបានគ្រប់គ្រាន់ ។ ប្រសិនបើមិនបានទទួលការព្យាបាលទេ ជាតិស្ករនឹងនៅតែមានកម្រិតខ្ពស់ក្នុងចរន្តឈាម និងបង្កការខូចខាតដល់សរីរាង្គផ្សេងៗ ។

តាមការប៉ាន់ប្រមាណ មានកុមារនិងក្មេងជំទង់ជាង ១,២ លាននាក់ ដែលមានអាយុក្រោម ២០ ឆ្នាំ កំពុងរស់នៅជាមួយជំងឺទឹកនោមផ្អែមប្រភេទ១ ហើយមានករណីថ្មីប្រមាណ ១៨៤ ១០០ ករណី ត្រូវបានធ្វើរោគវិនិច្ឆ័យឃើញជារៀងរាល់ឆ្នាំ ក្នុងពិភពលោក ។​

ទោះបីជាជំងឺទឹកនោមផ្អែមប្រភេទ១ ជាជំងឺរ៉ាំរ៉ៃមួយក្នុងចំណោមជំងឺរ៉ាំរ៉ៃដែលជួបប្រទះញឹកញាប់ចំពោះកុមារក៏ដោយ ក៏ជំងឺនេះជារឿយៗត្រូវបានធ្វើរោគវិនិច្ឆ័យខុស ជាពិសេសនៅតំបន់ដែលមានធនធានសុខាភិបាលមានកម្រិត ។ បុគ្គលិកសុខាភិបាលដែលមិនសូវបានប្រទះជំងឺទឹកនោមផ្អែមប្រភេទ១ អាចច្រឡំរោគសញ្ញារបស់ជំងឺនេះថាជាជំងឺគ្រុនចាញ់ ឬជំងឺផ្សេងទៀត ដែលមានរោគសញ្ញាប្រហាក់ប្រហែលគ្នា ។

ការចាក់អាំងស៊ុយលីនរៀងរាល់ថ្ងៃ គឺជាវិធីព្យាបាលរយៈពេលវែងតែមួយគត់ដែលមានប្រសិទ្ធភាពសម្រាប់អ្នកជំងឺទឹកនោមផ្អែមប្រភេទ១ ។ អ្នករស់នៅក្នុងតំបន់ដែលមានធនធានមានកម្រិត ជារឿយៗមិនសូវមានលទ្ធភាពទទួលបានសេវាថែទាំសុខភាពគ្រប់គ្រាន់ រួមទាំងការធ្វើរោគវិនិច្ឆ័យ ការថែទាំព្យាបាលទូលំទូលាយ និងអាំងស៊ុយលីនដែលមានសារៈសំខាន់ក្នុងការជួយសង្គ្រោះជីវិត ។

អង្គការ​អន្តរជាតិ​បំរើសុខភាព​ប្រជាជន (PSI) កំពុងអនុវត្ត​គម្រោង “ជំងឺទឹកនោមផ្អែមលើកុមារ (CDiC)” ដោយ​ទទួល​ថវិកា​ពី Novo Nordisk និងសហការយ៉ាងជិតស្និទ្ធជាមួយនាយកដ្ឋានការពារសុខភាព (PMD) នៃក្រសួងសុខាភិបាល និងមន្ទីរពេទ្យចំនួន១៤នៅកម្ពុជា ។

គោលបំណង​​របស់​គម្រោង​នេះ គឺ​ដើម្បី​លើក​កម្ពស់​ការ​ថែទាំ​​សុខភាព​ដល់​កុមារ​និងយុវវ័យ ដែល​មាន​ជំងឺទឹកនោមផ្អែមប្រភេទ១ ដោយក្នុងនោះគម្រោងបានផ្តល់នូវឱសថនិង​សម្ភារៈចាំបាច់ផ្សេងៗ ដល់អ្នកជំងឺជាកុមារ ដល់អាយុ២៥ឆ្នាំ ។​