ការចូលរួមរបស់យុវវ័យនៅក្នុងការលើកកម្ពស់សុខភាពផ្លូវភេទ និងសុខភាពបន្តពូជ
តម្រូវការព័ត៌មាន
ទោះបីជាយុវវ័យរួមភេទឬអត់ក៏ដោយ ក៏ពួកគេមានសិទ្ធិ ក្នុងការទទួលបានការអប់រំអំពីសុខភាពផ្លូវភេទនិងបន្តពូជ។ មានហេតុផលល្អជាច្រើន ចំពោះថាតើហេតុអ្វីការអប់រំនេះមានសារៈសំខាន់។ ការទទួលបានព័ត៌មាន អាចជួយឲ្យយុវវ័យធ្វើការសម្រេចចិត្ត សម្រាប់សុខភាពរបស់ខ្លួន រួមទាំងការពារខ្លួនឯងពីការមានផ្ទៃពោះដោយមិនបានគ្រោងទុក និងជំងឺកាមរោគផ្សេងៗ។
យោងទៅតាមរបាយការណ៍ “វិភាគស្ថានភាពរបស់យុវជននៅកម្ពុជា” ការយល់ដឹងអំពីសុខភាពបន្តពូជនិងសុខភាពផ្លូវភេទ នូវមានកំរិតនៅឡើង ក្នុងចំណោមយុវវ័យ។ ឪពុកម្តាយ និងសាលារៀន គឺជាប្រភពចំបងនៃការទទួលបានព័ត៌មានអំពីសុខភាពបន្តពូជនិងសុខភាពផ្លូវភេទ ក្នុងចំណោមប្រជាជនអាយុ១៥-២៤ ។
គម្រោងលើកកម្ពស់ឥរិយាបថ ប្រកបដោយសុខុមាលភាព (PHB) ដែលឧបត្ថម្ភថវិកាដោយទីភ្នាក់ងារជំនួយអាមេរិក USAID បានជជែកពិភាក្សាជាមួយប្រជាជនវ័យក្មេង៤៥នាក់ ហើយបានដឹងអំពីការយល់ខុសនិងព័ត៌មានមិនពិតជុំវិញសុខភាពបន្តពូជនិងសុខភាពផ្លូវភេទ។
យុទ្ធនាការដើម្បីយុវវ័យ ដោយយុវវ័យ
គម្រោង PHB បានរៀបចំសិក្ខាសាលាចំនួន២ ដើម្បីប្រមូលគំនិតផ្សេងៗ ជាមួយយុវជនយុវនារី ក្នុងការបង្កើតយុទ្ធនាការដែលផ្តោតទៅលើយុវវ័យ និងដោះស្រាយការប្រឈមទាក់ទងនឹងការយល់ខុសអំពីសុខភាពបន្តពូជនិងសុខភាពផ្លូវភេទ។
ដោយផ្អែកទៅលើយោបល់របស់យុវជនយុវនារី យុទ្ធនាការតាមរយៈអ៊ីនធើនែតមួយ ដែលមានឈ្មោះថា “ពីរនាក់បានហើយ” ត្រូវបានចាប់ដំណើរការនៅខែមករា ឆ្នាំ២០២២។ គម្រោង PHB បានចាប់ដៃគូជាមួយក្រុមហ៊ុនបង្កើតមាតិកា ដែលដឹកនាំដោយក្រុមយុវវ័យ ដែលមានឈ្មោះថា “ដុះស្លាប”។ ដុះស្លាប អនុវត្តយុទ្ធនាការនេះ ដែលអាចឲ្យប្រជាជនវ័យក្មេងអាចរៀនសូត្រប្រកបដោយឯកជនភាព អំពីការរួមភេទ ទំនាក់ទំនង និងរាងការយរបស់គេ ដោយចោទជាសំណួរទៅកាន់អ្នកជំនាញ។
ដោយអនុវត្តជាដំបងតាមប្រព័ន្ធអ៊ីនធើនែត យុទ្ធនាការនេះផ្តល់យុវជនយុវនារី នូវការទទួលបានព័ត៌មានអំពីសុខភាពបន្តពូជនិងសុខភាពផ្លូវភេទ នៅពេលណា និងកន្លែងណាក៏បាន តាមរយៈវេទិកាដែលពួកគេស្គាល់ស្រាប់: ហ្វេសប៊ុក.
ដោយផ្តល់ឲ្យយុវវ័យនូវឱកាសជាដៃគូក្នុងការសម្រេច និងអនុវត្តកម្មវិធីសុខភាព ដែលផ្តោតទៅលើក្រុមគោលដៅជាយុវជនយុវនារី ដែលមានអាយុស្របាលគ្នា និងការនិយាយស្តីដូចគ្នា អាចធ្វើឲ្យមានការចូលរួមដោយអស់ពីចិត្ត។ ដុះស្លាប គឺជាវេទិកាពហុប្រព័ន្ធផ្សព្វផ្សាយ ដែលបង្កើតឡើងដោយក្រុមស្ត្រីវ័យក្មេង ដែលខិតខំលើកកម្ពស់សុខុមាលភាពរបស់យុវវ័យ។ ពួកគេប្រមូលសំនួរ ដើម្បីយកទៅបង្កើតជាមាតិកា រួមមានវីដេអូសំនួរចម្លើយ រូបភាពព័ត៌មាន និងចំណោទសំនួរជាដើម។
១៣៥
គម្រោង PHB មានការចូលរួមពីប្រជាជនវ័យក្មេងជាង១៣៥នាក់ ដើម្បីបង្កើតយុទ្ធនាការនេះឡើង។
៣ ០០០ ០០០
មានការចូលមើលមាតិកាជាង៣លានដង ក្នុងពេល៣ខែដំបូង នៃយុទ្ធនាការនេះ។
“ពីរនាក់បានហើយ” គឺជាយុទ្ធនាការដែលខ្ញុំមានមោទនភាពបំផុត។ ខ្ញុំសង្ឃឹមថាយុទ្ធនាការនេះនឹងមានការចូលរួមច្រើនពីយុវជន ហើយពួកគេនឹងមានភាពក្លាហានក្នុងការនិយាយអំពីប្រធានបទដ៏សំខាន់នេះ នៅថ្ងៃអនាគម។
ប៊ុន សៅសុភនាថ សហស្ថាបនិកដុះស្លាប
* គម្រោងលើកកម្ពស់ឥរិយាបថប្រកបដោយសុខុមាលភាព (PHB) គឺជាគម្រោងផ្លាស់ប្តូរឥរិយាបថបុគ្គលនិងសង្គម ដែលចាប់ផ្តើមអនុវត្តក្នុងឆ្នាំ២០១៨ ឧបត្ថម្ភថវិកាដោយទីភ្នាក់ងារជំនួយអាមេរិក USAID ។ គោលដៅរបស់គម្រោងនេះ គឺដើម្បីធ្វើឲ្យប្រសើរឡើង នូវឥរិយាបថសុខភាពក្នុងចំណោមប្រជាជនកម្ពុជា និងធានាឲ្យបានថា ប្រជាជនកម្ពុជាស្វែងរក និងទទួលបានសេវាសុខភាព ដែលប្រកបដោយគុណភាព ដោយកាត់បន្ថយឧបសគ្គផ្នែកហិរញ្ញវត្ថុ ។ ដំបូងឡើយ គម្រោង PHB ផ្តោតទៅលើវិស័យសុខភាពធំៗចំនួន៦គឺ៖ សុខភាពមាតានិងទារក អាហារូបត្ថម្ភ ទឹកស្អាតនិងអនាម័យ ការពន្យារកំណើត ជំងឺរបេង និងជំងឺគ្រុនចាញ់។ ក្នុងឆ្នាំ២០២០ និង ២០២១ គម្រោង PHB បានអនុវត្តសកម្មភាពទាក់ទងនឹងជំងឺកូវីដ-១៩ ដើម្បីឆ្លើយតបនឹងការរីករាលដាលនៃជំងឺនេះ ។ នៅចុងឆ្នាំ២០២១ ជំងឺមិនឆ្លង ត្រូវបានដាក់បញ្ចូលទៅក្នុងសកម្មភាពរបស់គម្រោង ហើយរយៈពេលរបស់គម្រោងត្រូវបានបន្ត ដល់ឆ្នាំ២០២៥ ។