វគ្គបណ្តុះបណ្តាលដល់អ្នកផ្សព្វផ្សាយតាមសហគមន៍ អំពីការប្រើប្រាស់សម្ភារៈអប់រំ
បុគ្គលិកផ្សព្វផ្សាយសហគមន៍មានកាតព្វកិច្ចសំខាន់ ក្នុងការផ្តល់ព័ត៌មានពិតប្រាកដអំពីមធ្យោបាយពន្យារកំណើត នៅតាមជនបទ ក្នុងប្រទេសកម្ពុជា។ បុគ្គលិកផ្សព្វផ្សាយសហគមន៍ គឺជាអ្នកដែលប្រជាជននៅក្នុងសហគមន៍មានការទុកចិត្ត និងមានជំនាញផ្នែកទំនាក់ទំនងល្អ។ ពួកគេជួបជាមួយប្រជាជនទាំងប្រុសនិងស្រី នៅក្នុងសហគមន៍ ដើម្បីផ្តល់ព័ត៌មាននិងពិភាក្សា អំពីមធ្យោបាយពន្យារកំណើត ហើយជួយអ្នកភូមិនក្នុងដំណើរសម្រេចចិត្ត អំពីតម្រូវការពន្យារកំណើតរបស់គាត់។
ថ្មីៗនេះ នៅក្នុងខេត្តកំពង់ឆ្នាំង គម្រោងលើកកម្ពស់ឥរិយាបថប្រកបដោយសុខមាលភាព (PHB) បានធ្វើការយ៉ាងស្និទ្ធស្នាល ជាមួយអង្គការដៃគូ នៅតាមមូលដ្ឋាន ដើម្បីផ្តល់ការហ្វឹកហ្វឺនដល់បុគ្គលិកផ្សព្វផ្សាយសហគមន៍ អំពីវិធីដ៏មានប្រសិទ្ធភាពក្នុងការផ្សព្វផ្សាយសារអំពីការពន្យារកំណើត។ ក្រុមការងារ PHB របស់យើងដឹកនាំការហ្វឹកហ្វឺននេះ ដែលមានរយៈពេល៥ថ្ងៃ ជាមួយបុគ្គលិកផ្សព្វផ្សាយសហគមន៍ចំនួន៩នាក់។ នៅថ្ងៃចុងក្រោយនៃវគ្គហ្វឹកហ្វឺននោះ ពួកគាត់បានអនុវត្តជំនាញដែលបានរៀន ដោយបានទៅជួបអ្នកភូមិ និងសម្របសម្រួលការផ្សព្វផ្សាយតំបូងរបស់ពួកគាត់។
នៅក្នុងវគ្គផ្សព្វផ្សាយនោះ អ្នកភូមិត្រូវបានបំបែកជាក្រុម ដោយមានស្ត្រីនិងបុរសរួមគ្នា ព្រមទាំងមានអ្នកភូមិចំណាស់ចូលរួមផងដែរ។ អ្នកផ្សព្វផ្សាយសហគមន៍ប្រើសម្ភារៈអប់រំផ្សេងៗ ដោយក្នុងនោះរួមមាន សៀវភៅចំណងស្នេហ៍ ដើម្បីពិភាក្សាអំពីទំនាក់ទំនងដៃគូល្អ និងមធ្យោបាយពន្យារកំណើតផ្សេង។ សៀវភៅនេះទទួលប្រជាប្រិយភាពយ៉ាងខ្លាំង ពីសំណាក់ប្រជាជននៅក្នុងសហគមន៍។ សម្ភារៈផ្សេងទៀតរួមមានល្បែងទាយ ដែលមានលក្ខណៈសាមញ្ញនិងមានប្រសិទ្ធភាព ដោយល្បែងនេះតម្រូវអោយអ្នកលេងចាប់លេខ ដោយលេខនិមួយៗផ្តល់ព័ត៌មានពិតប្រាកដអំពីមធ្យោបាយពន្យារកំណើត។
“ខ្ញុំប្រើមធ្យោបាយពន្យារកំណើតបែបបុរាណ។ ការពិភាក្សាជាក្រុមនេះ បានធ្វើអោយខ្ញុំស្គាល់អ្វីជាពាក្យចចាមអារ៉ាម អ្វីជាការពិត។ ខ្ញុំក៏ចង់ប្រើកងដាក់ក្នុងស្បូនដែរ។ នៅពេលខ្ញុំត្រលប់ទៅផ្ទះវិញ ខ្ញុំនឹងពិភាក្សាអំពីជាមួយប្តីរបស់ខ្ញុំ។ ខ្ញុំមិនទាន់ចង់មានផ្ទៃពោះទៀតទេ ដោយចង់ចាំអោយកូនរបស់ខ្ញុំចូលរៀនសិន ទើបយកកូនមួយទៀត។”
ស្រ្តីម្នាក់ដែលចូលរួមវគ្គផ្សព្វផ្សាយជាមួយនឹងកូនតូចរបស់គាត់ បាននិយាយថា “ខ្ញុំប្រើមធ្យោបាយពន្យារកំណើតបែបបុរាណ។ ការពិភាក្សាជាក្រុមនេះ បានធ្វើអោយខ្ញុំស្គាល់អ្វីជាពាក្យចចាមអារ៉ាម អ្វីជាការពិត។ ខ្ញុំក៏ចង់ប្រើកងដាក់ក្នុងស្បូនដែរ។ នៅពេលខ្ញុំត្រលប់ទៅផ្ទះវិញ ខ្ញុំនឹងពិភាក្សាអំពីជាមួយប្តីរបស់ខ្ញុំ។ ខ្ញុំមិនទាន់ចង់មានផ្ទៃពោះទៀតទេ ដោយចង់ចាំអោយកូនរបស់ខ្ញុំចូលរៀនសិន ទើបយកកូនមួយទៀត។”
ដោយបានបញ្ចប់វគ្គបណ្តុះបណ្តាលដោយជោគជ័យ និងបានចុះអនុវត្ត្ផ្ទាល់ ក្រុមអ្នកផ្សព្វផ្សាយតាមសហគមន៍របស់យើង ត្រៀមរួចរាល់ជាស្រេច ក្នុងការចាប់ផ្តើមការផ្សព្វផ្សាយ ដល់ប្រជាជនក្នុងខេត្តកំពង់ឆ្នាំង។ នៅពេលទទួលបានការយល់ព្រមពីសំណាក់ដៃគូផ្នែករដ្ឋាភិបាល ការងារផ្សព្វផ្សាយនេះនឹងអាចចាប់ផ្តើមក្នុងរយៈពេល១ខែឬ២ខែទៀត ហើយយើងរំពឹងទុកនូវឥទ្ធិពលសកម្មភាពអប់រំនេះ ចំពោះក្រុមគ្រួសារក្នុងខេត្តកំពង់ឆ្នាំង។
