អន្តរាគមន៍ផ្លាស់ប្តូរឥរិយាបថ ស្តីពីជំងឺកូវីដ-១៩
ប្រទេសកម្ពុជាបានរកឃើញករណីជំងឺកូវីដ-១៩ លើកដំបូង នៅថ្ងៃទី២៧ ខែមករា ឆ្នាំ២០២០។ រាជរដ្ឋាភិបាលកម្ពុជាបានធ្វើសកម្មភាពយ៉ាងរហ័សដើម្បីទប់ស្កាត់ការឆ្លងរីករាលដាលនៃជំងឺនេះ។ ផែនការសកម្មភាពជាតិរបស់រាជរដ្ឋាភិបាលបានសង្កត់ធ្ងន់ទៅលើការកាត់បន្ថយនិងពន្យារការឆ្លង កាត់បន្ថយឱ្យបានជាអតិបរមានូវមានជំងឺធ្ងន់ធ្ងរ និងកាត់បន្ថយមរណភាពដែលទាក់ទងនឹងជំងឺនេះ និងធានាការបន្តសេវាសុខភាពសំខាន់ៗ ជាពិសេសក្នុងអំឡុងពេលនៃការផ្ទុះជំងឺនេះ និងកាត់បន្ថយឱ្យបានជាអតិបរមានូវផលប៉ះពាល់នៃការឆ្លងជំងឺនេះ ចំពោះវិស័យសង្គម និងសេដ្ឋកិច្ច តាមរយៈភាពជាដៃគូពហុវិស័យ។
គម្រោងលើកកម្ពស់ឥរិយាបថប្រកបដោយសុខុមាលភាព (PHB) ដែលឧបត្ថម្ភថវិកាដោយទីភ្នាក់ងារជំនួយអាមេរិក USAID បានរួមចំណែកក្នុងកិច្ចប្រឹងប្រែងនេះ ដើម្បីការពារនិងកាត់បន្ថយការឆ្លងរីករាលដាលនៃជំងឺនេះ ដោយធ្វើអន្តរាគមន៍តាមរយៈអ៊ីនធើនែត និងដោយផ្ទាល់ ក្នុងគោលបំណងលើកទឹកចិត្តឲ្យប្រជាជនកម្ពុជាទូទៅទទួលយកឥរិយាបថខាងក្រោម:
- លាងដៃនឹងសាប៊ូ យ៉ាងហោចណាស់២០វិនាទី
- ខ្ទប់មាត់នៅពេលក្អកឬកណ្តាស់ ដោយប្រើកែងដៃ ក្រដាស់ជូតមាត់ ឬពាក់ម៉ាស់
- រក្សាគម្លាតឲ្យបាន១,៥ម៉ែត្រ
- ជៀសវាងកន្លែងដែមានមនុស្សច្រើន
- ទាក់ទងទៅលេខ១១៥ សម្រាប់ព័ត៌មានបន្ថែមអំពីជំងឺកូវីដ-១៩
អន្តរាគមន៍តាមអ៊ីនធើនែត
ប្រទេសកម្ពុជាមានការកើនឡើងនៃករណីកូវីដ-១៩ ក្នុងខែកុម្ភៈ ឆ្នាំ២០២១ ដែលធ្វើឲ្យមានការរឹតបន្តឹងការធ្វើដំណើរ និងការបិទខ្ទប់បណ្តោះអាសន្ន។ ពិធីបុណ្យចូលឆ្នាំខ្មែរគឺជាឱកាស និងជាពេលវេលាដ៏សំខាន់ក្នុងការលើកកម្ពស់ឥរិយាបថសំខាន់ៗ ដើម្បីការពារការរីករាលដាលនៃជំងឺកូវីដ-១៩ នៅពេលដែលប្រជាជនកម្ពុជាធ្វើដំណើរទៅស្រុកកំណើត និងចូលរួមពិធីជួបជុំផ្សេងៗ។ ដើម្បីធានាថាសារអប់រំសុខភាព ទទួលបានការចាប់អារម្មណ៍ សម្ភារៈអប់រំត្រូវបានបង្កើតឡើងដោយមានប្រធានបទ២៖ (១) “ទេវតា” ដែលជាអមនុស្សនៅស្ថានសួគ៌ ដែលគេជឿថាជាអ្នកមើលការពារប្រជាជន (២) “ផ្កាយ” គឺជានិមិត្ដរូបនៃការបួងសួងសម្រាប់ឆ្នាំថ្មី។ មាតិកាជារូបភាពនិងវីដេអូ ដែលមានសារអំពីការយល់ដឹង និងវិធានការការពារសុវត្ថិភាពសំខាន់ៗស្តីពីជំងឺកូវីដ-១៩ ត្រូវបានចែកចាយយ៉ាងទូលំទូលាយ នៅតាមប្រព័ន្ធផ្សព្វផ្សាយសង្គមរបស់រាជរដ្ឋាភិបាល និងសារព័ត៌មានផ្សេងៗ។
វីដេអូគំនូរជីវចលមួយត្រូវបានរចនាឡើងដើម្បីផ្សព្វផ្សាយក្នុងអំឡុងពិធីបុណ្យជាតិនានា ដើម្បីលើកទឹកចិត្តឲ្យប្រជាជនកម្ពុជាមានការប្រុងប្រយ័ត្ន នៅពេលជួបនឹងមនុស្សចាស់។ មនុស្សចាស់ងាយនឹងជួបហានិភ័យដោយសារតែជំងឺកូវីដ-១៩។
Chatbot បានផ្តល់ព័ត៌មានដែលត្រឹមត្រូវនិងទាន់ពេលវេលា ដល់សាធារណជន។ ប្រជាជនគ្រប់រូបអាចចូល chatbot ដែលមានភាពងាយស្រួលប្រើប្រាស់ ដើម្បីទទួលព័ត៌មានដែលមានអត្ថប្រយោជន៍ ហើយងាយក្នុងការចែករំលែកព័ត៌មានជាមួយគ្រួសារ និងមិត្តភក្តិ ដើម្បីស្វែងយល់ការពិតអំពីពាក្យចចាមអារ៉ាមផ្សេងៗ។
សម្ភារទំនាក់ទំនងអប់រំព័ត៌មាន (IEC) តាមប្រព័ន្ធអ៊ីនធើនែត ត្រូវបានបង្កើតឡើង ដើម្បីជួយនិងគាំទ្រដល់ការលើកកម្ពស់ការយល់ដឹងអំពីកូវីដ-១៩ និងលើកទឹកចិត្តដល់សាធារណជន ឲ្យទទួលយកវិធានការការពារសំខាន់ៗ ដើម្បីកាត់បន្ថយការឆ្លងនៃវីរុសនេះ។ មាតិកានៃសម្ភារ IEC ទាំងនេះត្រូវបានបង្កើតឡើង ក្រោមប្រធានបទនៃ យុទ្ធនាការអ្នកប្រយុទ្ធនឹងកូវីដ-១៩ ដែលមានតួអង្គជាអ្នកប្រយុទ្ធល្បុក្កតោ ផ្តល់ព័ត៌មានទាក់ទងនឹងជំងឺកូវីដ-១៩ ដើម្បីប្រយុទ្ធនឹងជំងឺនេះទាំងអស់គ្នា។
អន្តរាគមន៍ដោយផ្ទាល់
យុទ្ធនាការ២ត្រូវបានបង្កើតឡើង សម្រាប់សហគមន៍ដើម្បីបង្កើនការយល់ដឹង អំពីជំងឺកូវីដ-១៩ និងលើកទឹកចិត្តឲ្យសាធារណជនចាប់យកឥរិយាបថការពារជំងឺនេះ តាមការណែនាំរបស់រាជរដ្ឋាភិបាលកម្ពុជា។
យុទ្ធនាការ “អាយុវែង” បានកំណត់យកមនុស្សចាស់អាយុ ៦០+ ឆ្នាំ ក្នុងខេត្តបាត់ដំបង ជាក្រុមគោលដៅ។ យុទ្ធនាការដែលមានរយៈពេល១ខែនេះ លើកទឹកចិត្តឲ្យមនុស្សចាស់ទទួលយកឥរិយាបថដើម្បីការពារសុខភាពរបស់គាត់និងអ្នកដទៃ ពីជំងឺកូវីដ-១៩ នៅពេលដែលពួកគាត់ទៅលេងផ្ទះអ្នកជិតខាង។ មេភូមិត្រូវបានអញ្ជើញឲ្យដើរតួនាទីជាជនគំរូ ដោយគាត់បានរៀបចំផ្ទះរបស់គាត់ដើម្បីការពារការឆ្លងកូវីដ-១៩ (ដូចជារៀបចំកន្លែងលាងដៃ និងកន្លែងរក្សាគម្លាតជាដើម) និងដើម្បីជំរុញឲ្យអ្នកភូមិរបស់គាត់ធ្វើតាម។ សរុបមក ពេលដែលយុទ្ធនាការចាប់ផ្តើមបាន៣សប្តាហ៍ មានអ្នកភូមិតចំនួន៨៩៣ នាក់បានមកផ្ទះរបស់មេភូមិទាំងអស់ដែលយើងធ្វើការជាមួយ ក្នុងនោះមាន៣១% គឺជាអ្នកដែលមានអាយុជាង៦០ឆ្នាំ។ លើសពីនេះទៅទៀត មានគ្រួសារចំនួន១៤៥ខ្នងផ្ទះ បានរៀបចំឲ្យមានកន្លែងលាងដៃត្រឹមត្រូវ ក្នុងអំឡុងពេលនៃយុទ្ធនាការនេះ។
ដោយបញ្ចូលវប្បធម៌ ដូចជាល្បុក្កតោ ប្រជាជនកម្ពុជាត្រូវបានណែនាំឲ្យអនុវត្តឥរិយាបថការពារជំងឺកូវីដ-១៩សំខាន់ៗដោយភ្នាក់ងារអប់រំសុខភាពរបស់គម្រោង ធ្វើត្រាប់តាមកាយវិការនៃក្បាច់ប្រយុទ្ធបុរាណ។ យុទ្ធនាការអ្នកប្រយុទ្ធកូវីដ-១៩នេះ ប្រើយុទ្ធសាស្ត្រ ដែលឲ្យអ្នកទៅផ្សារដើរពីភ្នាក់ងារអប់រំមួយ ទៅភ្នាក់ងារអប់រំមួយទៀតដែលនៅជិតនោះ។ ភ្នាក់ងារអប់រំនិមួយៗបង្ហាញអំពីឥរិយាបថនិមួយៗដើម្បីការងារពីកូវីដ-១៩ ដូចជាការលាងដៃត្រឹមត្រូវ ។ យុទ្ធនាការនេះបានចូលរួមអប់រំប្រជាជនសរុប ១៥៩៥៩ នាក់ នៅក្នុងខេត្តចំនួន៤ គឺខេត្តបាត់ដំបង ខេត្តកំពង់ឆ្នាំង ខេត្តត្បូងឃ្មុំ និងខេត្តកំពង់ចាម។
ការពង្រឹងសមត្ថភាព និងការសម្របសម្រួល ក្នុងចំណោមអ្នកអនុវត្តកិច្ចការផ្លាស់ប្តូរឥរិយាបថបុគ្គលនិងសង្គមដើម្បីសុខភាព
គម្រោង PHB ក៏ចូលរួមចំណែកក្នុងការពង្រឹងការសម្របសម្រួល និងការអនុវត្តកិច្ចការទាក់ទងនឹងការផ្លាស់ប្តូរឥរិយាបថ ស្តីពីជំងឺកូវីដ-១៩។ វេទិកាផ្លាស់ប្តូរឥរិយាបថបុគ្គលនិងសង្គម (SBC Forum) ចំនួន២ ក្រោមប្រធានបទកូវីដ-១៩ ត្រូវបានរៀបចំឡើង នៅថ្នាក់ជាតិ និងថ្នាក់ក្រោមជាតិ ។ គម្រោង PHB ក៏បានជួយគាំទ្រដល់ការបង្កើនសមត្ថភាព ជាមួយមជ្ឈមណ្ឌលជាតិលើកកម្ពស់សុខភាព (NCHP) នៃក្រសួងសុខាភិបាល ដោយមានការផ្តល់យោបល់ផ្សេងៗ ដល់យុទ្ធសាស្ត្រនៃយុទ្ធនាការ របស់ NCHP រួមមានការកំណត់ក្រុមគោលដៅ គោលដៅទំនាក់ទំនងរបស់យុទ្ធនាការ និងមធ្យោបាយក្នុងការផ្សព្វផ្សាយសារសុខភាព ។ល។
* គម្រោងលើកកម្ពស់ឥរិយាបថប្រកបដោយសុខុមាលភាព (PHB) គឺជាគម្រោងផ្លាស់ប្តូរឥរិយាបថបុគ្គលនិងសង្គម ដែលចាប់ផ្តើមអនុវត្តក្នុងឆ្នាំ២០១៨ ឧបត្ថម្ភថវិកាដោយទីភ្នាក់ងារជំនួយអាមេរិក USAID ។ គោលដៅរបស់គម្រោងនេះ គឺដើម្បីធ្វើឲ្យប្រសើរឡើង នូវឥរិយាបថសុខភាពក្នុងចំណោមប្រជាជនកម្ពុជា និងធានាឲ្យបានថា ប្រជាជនកម្ពុជាស្វែងរក និងទទួលបានសេវាសុខភាព ដែលប្រកបដោយគុណភាព ដោយកាត់បន្ថយឧបសគ្គផ្នែកហិរញ្ញវត្ថុ។ ដំបូងឡើយ គម្រោង PHB ផ្តោតទៅលើវិស័យសុខភាពធំៗចំនួន៦គឺ៖ សុខភាពមាតានិងទារក អាហារូបត្ថម្ភ ទឹកស្អាតនិងអនាម័យ ការពន្យារកំណើត ជំងឺរបេង និងជំងឺគ្រុនចាញ់។ ក្នុងឆ្នាំ២០២០ និង ២០២១ គម្រោង PHB បានអនុវត្តសកម្មភាពទាក់ទងនឹងជំងឺកូវីដ-១៩ ដើម្បីឆ្លើយតបនឹងការរីករាលដាលនៃជំងឺនេះ ។ នៅចុងឆ្នាំ២០២១ ជំងឺមិនឆ្លង ត្រូវបានដាក់បញ្ចូលទៅក្នុងសកម្មភាពរបស់គម្រោង ហើយរយៈពេលរបស់គម្រោងត្រូវបានបន្ត ដល់ឆ្នាំ២០២៥ ។