ការបង្កើត Dashboard សម្រាប់ធនធានឆ្លើយតបគ្រោះបន្ទាន់
ការឆ្លើយតបទៅនឹងការរីករាលដាលនៃជំងឺ និងគ្រោះបន្ទាន់ផ្នែកសុខភាពសាធារណៈ ត្រូវការមជ្ឈមណ្ឌលប្រតិបត្តិការគ្រោះបន្ទាន់នៃសុខភាពសារធារណៈ (PHEOC) ដើម្បីមានធនធានច្បាស់លាស់ សម្រាប់ធ្វើការឆ្លើយតប រួមមានធនធានមនុស្ស ហេដ្ឋារចនាសម្ព័ន្ធ និងឧបករណ៍។ ព័ត៌មានទាំងនេះមានសារៈសំខាន់ មិនត្រឹមតែក្នុងអំឡុងពេលមានគ្រោះបន្ទាន់ដើម្បីជូនដំណឹងអំពីការគ្រប់គ្រងធនធាននិងការឆ្លើយតបប៉ុណ្ណោះទេ ប៉ុន្តែក៏មានសារៈសំខាន់ក្នុងពេលបង្កើតយុទ្ធសាស្ត្រផែនការឆ្លើយតប ចង្អុលបង្ហាញចំនុចត្រង់ណាដែលត្រូវធ្វើការបណ្តុះបណ្តាល និងបង្កើនសមត្ថភាព ឬបែងចែកធនធាននៅថ្នាក់ក្រោមជាតិ ក្នុងការប្រុងប្រៀបចំពោះគ្រោះបន្ទាន់ណាមួយ។
អង្គការអន្តរជាតិបំរើសុខភាពប្រជាជន (PSI) ធ្វើការជួយយ៉ាងសកម្មដល់នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល (CDC-MoH) ក្នុងការដោះស្រាយការខ្វះចន្លោះនៃសុវត្ថិភាពសុខាភិបាល ក្រោមការវិនិយោគបីឆ្នាំ (២០២០-២០២៣) ដោយមជ្ឈមណ្ឌលឥណ្ឌូ-ប៉ាស៊ីហ្វិកសម្រាប់សន្តិសុខសុខាភិបាលនៃក្រសួងការបរទេសអូស្ត្រាលី ដើម្បីពង្រឹង PHEOC និងបង្កើនសមត្ថភាពថ្នាក់ជាតិយូរអង្វែង ក្នុងការតាមដាន ប្រុងប្រៀប និងឆ្លើយតប ទៅនឹងការរីករាលដាលនៃជំងឺនានា។
នៅក្នុងឆ្នាំ២០២១ អង្គការ PSI និង CDC-MoH បានផ្តើមនូវដំណើរការដើម្បីបង្កើត dashboard សម្រាប់ធនធានឆ្លើយតបគ្រោះបន្ទាន់ នៅក្នុង CamEWARN ដែលជាប្រព័ន្ធជាតិសម្រាប់តាមដានស្រាវជ្រាវជំងឺ ដោយប្រើវេទិកា DHIS2 ដើម្បីប្រើប្រាស់ដោយមន្ត្រីសុខាភិបាល សម្រាប់សកម្មភាពត្រៀមនិងឆ្លើយតបទៅនឹងគ្រោះបន្ទាន់។ ការអនុវត្តសាកល្បងត្រូវបានធ្វើឡើងដោយជោគជ័យនៅខេត្តចំនួន៧ ក្នុងឆ្នាំ២០២២។
ឯកសារសង្ខេបនេះ ពិពណ៌នាអំពីបទពិសោធន៍ ក្នុងការរៀបចំ បង្កើត និងសាកល្បង dashboard សម្រាប់ធនធានឆ្លើយតបគ្រោះបន្ទាន់ មកដល់បច្ចុប្បន្ននេះ។