ពីរនាក់បានហើយ
សកម្មភាពផ្លាស់ប្តូរឥរិយាបថបុគ្គលនិងសង្គម ដើម្បីបង្កើនការប្រើប្រាស់មធ្យោបាយពន្យារកំណើតទំនើប សម្រាប់យុវជននៅទីក្រុង
និន្នាការប្រជាសាស្ត្របានបង្ហាញឲ្យឃើញគំលាតកាន់តែធំ រវាងភាពពេញវ័យផ្នែកផ្លូវភេទ និងអាយុនៃការរៀបការ។ ដោយរួមទាំងការផ្លាស់ប្តូរទស្សនៈបែបប្រពៃណី នៅតំបន់ទីក្រុង មានការកើនឡើងនូវសកម្មភាពផ្លូវភេទមុនរៀបការ ក្នុងចំណោមយុវជនពេញវ័យ ក្នុងប្រទេសកម្ពុជា។ យុវជនជាច្រើនដែលមានដៃគូ ក្នុងទីក្រុងភ្នំពេញ មិនបានប្រើការពន្យារកំណើត ជាពិសេសមធ្យោបាយទំនើប (MM) ។ យោងទៅតាម ការស្ទង់មតិប្រជាសាស្ត្រ និងសុខភាពកម្ពុជា (CDHS) ក្នុងឆ្នាំ២០១៤ មាន១៨% នៃយុវជនដែលមានដៃគូ អាយុពី១៥-២៤ ឆ្នាំ បានប្រើ MM និង ៣១% បានប្រើមធ្យោបាយបុរាណ។ ៥០% នៃអ្នកដែលមិនបានប្រើ MM ពុំចង់បានកូនក្នុងពេលឆាប់ៗខាងមុខទេ។ យុវជននៅទីក្រុងភ្នំពេញ គឺក្រុមគោលដៅដែលមិនសូវទទួលបានការយកចិត្តទុកដាក់ ដោយកម្មវិធីសុខភាពភាគច្រើនផ្តោតទៅលើស្ត្រីរៀបការហើយនៅតាមជនបទ។
គម្រោងលើកកម្ពស់ឥរិយាបថ ប្រកបដោយសុខុមាលភាព (PHB) អនុវត្តសកម្មភាពផ្លាស់ប្តូរឥរិយាបថបុគ្គលនិងសង្គម ជាមួយនឹងដៃគូអនុវត្តក្នុងស្រុក ដើម្បីបង្កើនចំណេះដឹង ផ្លាស់ប្តូរការយល់ឃើញជុំវិញមធ្យោបាយពន្យារកំណើតទំនើប និងសុខភាពផ្លូវភេទនិងបន្តពូជ ព្រមទាំងបង្កើនការប្រើប្រាស់មធ្យោបាយពន្យារកំណើតទំនើបក្នុងចំណោមយុវជននៅក្នុងទីក្រុងភ្នំពេញ។ ដោយផ្អែកទៅតាមការចុះសិក្សាផ្ទាល់នៅសហគមន៍ និងទិន្នន័យដែលប្រមូលបាន យុទ្ធនាការ “ពីរនាក់បានហើយ” ត្រូវបានបង្កើតឡើង ដោយប្រើប្រាស់វេទិកា និងប្រព័ន្ធផ្សព្វផ្សាយ តាមអ៊ីនធើនែត ដើម្បីបានទៅដល់ក្រុមគោលដៅដែលមានដៃគូ អាយុ១៨-២៩ឆ្នាំ ដើម្បីកាត់បន្ថយការមានផ្ទៃពោះដោយមិនបានគ្រោងទុក។
សារសំខាន់ៗ
- ស្វែងរកព័ត៌មានត្រឹមត្រូវអំពីការពន្យារកំណើតទំនើប ដើម្បីឲ្យអ្នកអាចធ្វើការសម្រេចចិត្តអំពីការពន្យារកំណើត
- ទទួលបានសេវាសុខភាពដែលរក្សាការសំងាត់ មិនវិនិច្ឆ័យអវិជ្ជមាន និងមានភាពងាយស្រួលដល់យុវជន
ក្រុមគោលដៅ
- យុវជនដែលមានដៃគូ មិនទាន់រៀបការ អាយុ១៨-២៩ រស់នៅក្នុងទីប្រជុំជននៃទីក្រុងភ្នំពេញ
គោលបំណងឥរិយាបថ
- បង្កើនចំណេះដឹងនិងផ្តល់ព័ត៌មានត្រឹមត្រូវអំពីសុខភាពបន្តពូជ និងមធ្យោបាយពន្យារកំណើតទំនើបផ្សេងៗ
- ច្រានចោលការយល់ខុសជុំវិញសុខភាពផ្លូវភេទ និងបន្តពូជ ព្រមទាំងមធ្យោបាយពន្យារកំណើតទំនើប
- ផ្តល់សិទ្ធិអំណាចដល់យុវជនដោយឲ្យពួកគេទទួលបានព័ត៌មានត្រឹមតូវដើម្បីធ្វើការសម្រេចចិត្ត
- លើកទឹកចិត្តយុវជនឲ្យប្រើប្រាស់មធ្យោបាយពន្យារកំណើតទំនើប និងធ្វើផែនការសម្រាប់អនាគត
យុទ្ធសាស្ត្រ
ការសិក្សា រួមទាំងការសម្ភាសន៍ជាមួយយុវវ័យ៤៥នាក់ ត្រូវបានធ្វើឡើង ដើម្បីប្រមូលព័ត៌មានអំពីបរិយាកាសនៃប្រព័ន្ធផ្សព្វផ្សាយ ក្នុងចំណោមយុវជនរស់នៅក្នុងទីក្រុងភ្នំពេញ និងការយល់ឃើញរបស់ពួកគេអំពីការរួមភេទ ទំនាក់ទំនង និងការពន្យារកំណើត។ ដោយផ្អែកទៅលើការរកឃើញតាមរយៈការសិក្សានេះ ចំនុចមួយចំនួនត្រូវបានកំណត់ និងប្រើប្រាស់ដើម្បីជាការណែនាំដល់យុទ្ធនាការសុខភាពនេះ:
- ទីកន្លែងសម្រាប់ការទទួលបានព័ត៌មានដែលងាយស្រួលសម្រាប់យុវជន (ទីកន្លែងដែលរក្សាការសម្ងាត់ ដែលយុវជនមិនត្រូវបានគេវិនិច្ឆ័យមិនល្អ)
- ព័ត៌មានដែលត្រឹមត្រូវ និងច្បាស់លាស់ (មានប្រភពពីអ្នកជំនាញ នៅក្នុងបរិយាកាសសាមញ្ញ និងផ្តោតទៅលើសុខភាពផ្ទាល់ខ្លួន ផលរំខាន គុណភាព និងតំលៃ
- វប្បធម៌និងភាសា (ព័ត៌មានអំពីសុខភាពផ្លូវភេទ និងសុខភាពបន្តពូជ ព្រមទាំងជម្រើសមធ្យោបាយពន្យារកំណើតទំនើប ត្រូវបានលើកយកមកពិភាក្សាយ៉ាងណា ដែលធ្វើឲ្យយល់ដល់យុវវ័យ និងត្រូវបានពន្យល់តាមរយៈភាសានិងវប្បធម៌របស់គេ)
- ឌីជីថល (ជាទីកន្លែងជួបយុវជន ដោយផ្តល់អត្ថប្រយោជន៍ក្នុងការមិនចាំបាច់បញ្ចេញអត្ដសញ្ញណ និងងាយទទួលបានព័ត៌មាន)
- ពិភាក្សាអំពីសុខភាពផ្លូវភេទ និងសុខភាពបន្តពូជ ជាផ្នែកមួយនៃសុខាភិបាល (លើកឡើងអំពីព័ត៌មានទាំងនេះជាផ្នែកមួយនៅក្នុងវិស័យសុខាភិបាលដ៏ធំធេង និងលើកទឹកចិត្តយុវជន ឲ្យស្វែងរកព័ត៌មានសុខភាព សម្រាប់ខ្លួនគេ មិត្តភក្តិរបស់គេ និងអនាគតខ្លួនឯង)
យុទ្ធនាការ “ពីរនាក់បានហើយ” ប្រើប្រាស់វេទិកាប្រព័ន្ធផ្សព្វផ្សាយផ្សេងៗ មានដូចជាវែបសាយ និងហ្វេសប៊ុក ដើម្បីបានទៅដល់ក្រុមគោលដៅ។ មាតិកាពហុប្រព័ន្ធផ្សព្វផ្សាយដែលផ្តល់ការទំនាក់ទំនងទៅវិញទៅមក មានដូចជាកម្រងសំនួរ អត្ថបទ ផុសជាសំនួរ ផុសជាក្រាហ្វិក ផុសជាចម្លើយ និងវីដេអូ ត្រូវបានរៀបចំឡើង និងប្រើដើម្បីលើកកម្ពស់ការយល់ដឹងអំពីសុខភាពផ្លូវភេទនិងបន្តពូជ ព្រមទាំងមធ្យោបាយពន្យាកំណើតក្នុងចំណោមយុវជន បង្កើនការចូលរួម និងលើកទឹកចិត្តឲ្យធ្វើសកម្មភាព ពីសំណាក់ក្រុមគោលដៅ។
ដើម្បីលើកកម្ពស់ការយល់ដឹង មាតិកាជាពហុប្រព័ន្ធផ្សព្វផ្សាយ រួមមានផុស និងវីដេអូខ្លីៗ ត្រូវបានបង្កើតឡើងដើម្បីជំរុញការយល់ដឹងលើសារសំខាន់ៗ នៃយុទ្ធនាការនេះ។ ដើម្បីជាការចូលរួមរបស់យុវជន ផុស វីដេអូ និងឆេតប៊ត់ ត្រូវបានប្រើប្រាស់ដើម្បីលើកទឹកចិត្តឲ្យយុវជនពិភាក្សា និងសួរសំនួរទាក់ទងនឹងសុខភាពផ្លូវភេទ និងសុខភាពបន្តពូជ ព្រមទាំងមធ្យោបាយពន្យារកំណើត។ លើសពីនេះទៅទៀត អ្នកដែលបានចូលរួមពិភាក្សាតាមរយៈអ៊ីនធើនែត ត្រូវបានលើកទឹកចិត្ត ឲ្យចែករំលែក និងគាំទ្រទំព័រហ្វេសប៊ុក និងមាតិការបស់យុទ្ធនាការនេះ។ ដើម្បីជំរុញសកម្មភាព យុទ្ធនាការក៏ផ្តល់ព័ត៌មានដែលត្រឹមត្រូវនិងទុកចិត្តបាន ពីអ្នកជំនាញ និងការបញ្ជូនទៅកាន់សេវាសម្រាប់យុវជនផងដែរ។
តើអ្នកកំពុងរង់ចាំចម្លើយរបស់អ្នកដែលបានសួរកាលពីលើកមុនមែនដែរឬទេ? ប្រសិនបើមែន នេះជាចម្លើយរបស់អ្នក។…
Posted by ដុះស្លាប Dosslarb on Sunday, October 30, 2022
មាតិកានៃយុទ្ធនាការត្រូវបានរចនាឡើង ទៅតាមប្រធានបទ៣ ដើម្បីធានាថាមាតិកាទាំងនេះស្របទៅតាមគោលបំណងនៃយុទ្ធនាការ ស្របទៅតាមស្ថានភាពទូទៅ និងផ្តល់នូវព័ត៌មានដែលយុវជនកំពុងស្វែងរក:
“ការពន្យារកំណើត” អប់រំ និងផ្តល់សិទ្ធិអំណាចដល់យុវជន តាមរយៈមាតិកាដែលស្របទៅតាមការពិត។ ការឆ្លើយសំណួរដែលយុវជនចង់ដឹង និងប្រាប់ពួកគេអំពីប្រធានបទដែលពួកគេអាចនឹងមិនដឹងសួរថាម៉េច។ ប្រធានបទរួមមានទិដ្ឋភាពទូទៅអំពីសុខភាពបន្តពូជនិងផ្លូវភេទ ជម្រើសនៃមធ្យោបាយពន្យារកំណើតទំនើប និងការបកស្រាយអំពីព័ត៌មានមិនពិត។
“អនាគត” លើកទឹកចិត្តយុវជនឲ្យស្វែងរកចំណេះដឹង ជុំវិញជម្រើសរបស់ពួកគេ និងរំលឹកពួកគេថាពួកគេជាអ្នកគ្រប់គ្រងអនាគតរបស់ពួកគេ។ ប្រធានបទរួមមានគោលដៅជីវិត ទំនាក់ទំនង និងគ្រួសារ ព្រមទាំងមុខរបរ។
“ការផ្សារភ្ជាប់និងសេវាសុខភាព” ផ្តល់ដល់យុវជននូវអ្នកផ្តល់សេវាសុខភាពដែលទុកចិត្តបាន ដែលអាចផ្តល់សេវាដែលគេត្រូវការ។ ប្រធានបទនេះ រួមមានសេវាសម្រាប់យុវជន និងអ្នកផ្តល់សេវាសុខភាពតាមប្រព័ន្ធអ៊ីនធើនែត។
មាតិកាទាំងអស់ត្រូវបានបង្កើតឡើងជាបីផ្នែកគឺ (១) ចម្ងល់ ដែលរួមមានប្រធានបទស្តីពី “រាងកាយរបស់ខ្ញុំ” “ការយល់ឃើញរបស់អ្នកនៅជុំវិញខ្លួន” និង “ជម្រើសរបស់ខ្ញុំ”។ (២) ការចែករំលែកទំនួលខុសត្រូវ ដែលរួមមានប្រធានបទស្តីពី “តួនាទីយែនឌ័រទៅលើមធ្យោបាយពន្យារកំណើតទំនើប និងការមានផ្ទៃពោះ” “ការចាប់ផ្តើមនៃការសន្ទនា” និង “អ្នកផ្តល់សេវាសុខភាព”។ (៣) គោលដៅរបស់ខ្ញុំ ដែលមានប្រធានបទដូចជា “សារសំខាន់នៃការធ្វើផែនការ” “របៀបនៃការរៀបចំគោលដៅ” និង “ការចាប់ផ្តើមគ្រួសារ”។
ក្រៅពីនេះ វគ្គសំនួរនិងចម្លើយ គឺចំនុចចំបងនៃយុទ្ធនាការនេះ ដោយមានការចូលរួមពីយុវជនក្នុងការកសាងចំណេះដឹង ដើម្បីឆ្លើយតបទៅនឹងសំនួរដែលមាននៅក្នុងជីវិតពិត។ សំនួរទាំងនេះត្រូវបានប្រមូលតាមរយៈវែបសាយ ហ្វេសប៊ុក និង Messenger ។ ចម្លើយដែលត្រឹមត្រូវនិងអាចជឿជាក់បាន ត្រូវបានផ្តល់ដោយអ្នកជំនាញ និងផ្សព្វផ្សាយ ជាទម្រង់ពហុប្រព័ន្ធផ្សព្វផ្សាយ។
ការតាមដាន វាយតម្លៃ និងសិក្សា
* គម្រោងលើកកម្ពស់ឥរិយាបថប្រកបដោយសុខុមាលភាព (PHB) គឺជាគម្រោងផ្លាស់ប្តូរឥរិយាបថបុគ្គលនិងសង្គម ដែលចាប់ផ្តើមអនុវត្តក្នុងឆ្នាំ២០១៨ ឧបត្ថម្ភថវិកាដោយទីភ្នាក់ងារជំនួយអាមេរិក USAID ។ គោលដៅរបស់គម្រោងនេះ គឺដើម្បីធ្វើឲ្យប្រសើរឡើង នូវឥរិយាបថសុខភាពក្នុងចំណោមប្រជាជនកម្ពុជា និងធានាឲ្យបានថា ប្រជាជនកម្ពុជាស្វែងរក និងទទួលបានសេវាសុខភាព ដែលប្រកបដោយគុណភាព ដោយកាត់បន្ថយឧបសគ្គផ្នែកហិរញ្ញវត្ថុ ។ ដំបូងឡើយ គម្រោង PHB ផ្តោតទៅលើវិស័យសុខភាពធំៗចំនួន៦គឺ៖ សុខភាពមាតានិងទារក អាហារូបត្ថម្ភ ទឹកស្អាតនិងអនាម័យ ការពន្យារកំណើត ជំងឺរបេង និងជំងឺគ្រុនចាញ់។ ក្នុងឆ្នាំ២០២០ និង ២០២១ គម្រោង PHB បានអនុវត្តសកម្មភាពទាក់ទងនឹងជំងឺកូវីដ-១៩ ដើម្បីឆ្លើយតបនឹងការរីករាលដាលនៃជំងឺនេះ ។ នៅចុងឆ្នាំ២០២១ ជំងឺមិនឆ្លង ត្រូវបានដាក់បញ្ចូលទៅក្នុងសកម្មភាពរបស់គម្រោង ហើយរយៈពេលរបស់គម្រោងត្រូវបានបន្ត ដល់ឆ្នាំ២០២៥ ។
* គម្រោងលើកកម្ពស់ឥរិយាបថប្រកបដោយសុខុមាលភាព (PHB) គឺជាគម្រោងផ្លាស់ប្តូរឥរិយាបថបុគ្គលនិងសង្គម ដែលចាប់ផ្តើមអនុវត្តក្នុងឆ្នាំ២០១៨ ឧបត្ថម្ភថវិកាដោយទីភ្នាក់ងារជំនួយអាមេរិក USAID ។ គោលដៅរបស់គម្រោងនេះ គឺដើម្បីធ្វើឲ្យប្រសើរឡើង នូវឥរិយាបថសុខភាពក្នុងចំណោមប្រជាជនកម្ពុជា និងធានាឲ្យបានថា ប្រជាជនកម្ពុជាស្វែងរក និងទទួលបានសេវាសុខភាព ដែលប្រកបដោយគុណភាព ដោយកាត់បន្ថយឧបសគ្គផ្នែកហិរញ្ញវត្ថុ ។ ដំបូងឡើយ គម្រោង PHB ផ្តោតទៅលើវិស័យសុខភាពធំៗចំនួន៦គឺ៖ សុខភាពមាតានិងទារក អាហារូបត្ថម្ភ ទឹកស្អាតនិងអនាម័យ ការពន្យារកំណើត ជំងឺរបេង និងជំងឺគ្រុនចាញ់។ ក្នុងឆ្នាំ២០២០ និង ២០២១ គម្រោង PHB បានអនុវត្តសកម្មភាពទាក់ទងនឹងជំងឺកូវីដ-១៩ ដើម្បីឆ្លើយតបនឹងការរីករាលដាលនៃជំងឺនេះ ។ នៅចុងឆ្នាំ២០២១ ជំងឺមិនឆ្លង ត្រូវបានដាក់បញ្ចូលទៅក្នុងសកម្មភាពរបស់គម្រោង ហើយរយៈពេលរបស់គម្រោងត្រូវបានបន្ត ដល់ឆ្នាំ២០២៥ ។