មធ្យោបាយពន្យារកំណើតទំនើប ការពារការមានផ្ទៃពោះដែលមិនបានគ្រោងទុក និងផ្តល់គុណភាពនៃជីវិតដល់គ្រួសារជនបទ ក្នុងប្រទេសកម្ពុជា
ការពន្យារកំណើតដោយប្រើមធ្យោបាយបែបទំនើប (MM) មានសារសំខាន់ ក្នុងការការពារការមានផ្ទៃពោះដែលមិនបានគ្រោងទុក ដែលធ្វើឲ្យដៃគូ ឬប្តីប្រពន្ធអាចគ្រប់គ្រងជម្រើសជីវិតបានប្រសើរជាងមុន និងផ្តល់ការថែទាំល្អដល់កូនៗ និងគ្រួសាររបស់គេ ដោយជៀសវាងឧបសគ្គផ្នែកហិរញ្ញវត្ថុ។ ការពន្យារកំណើតក៏អាចជួយដល់សុខភាពរបស់ម្តាយ និងកូនតូចៗរបស់គាត់ ព្រមទាំងរក្សាគុណភាពនៃជីវិតបានល្អ។ នៅក្នុងតំបន់ជនបទនៃប្រទេសកម្ពុជា ប្រជាជនអាចមានឧបសគ្គក្នុងការទទួលបានព័ត៌មាន និងការទទួលបានមធ្យោបាយការពន្យារកំណើតបែបទំនើប ដោយសារសេវាសុខភាពខ្លះនៅមូលដ្ឋានសុខាភិបាលនៅមានកំរិត និងចំងាយឆ្ងាយក្នុងការធ្វើដំណើរទៅមូលដ្ឋានសុខាភិបាលទាំងនោះ។
ប្រភពព័ត៌មានដែលប្រជាជនក្នុងសហគមន៍តែងទទួលបានគឺដោយការនិយាយតៗគ្នា ក្នុងចំណោមមិត្តភក្តិ និងគ្រួសារ ហើយជាញឹកញាប់ព័ត៌មានទាំងនោះគឺមិនបានពេញលេញ មិនត្រឹមត្រូវ និងអាចបណ្តាលឲ្យមានការយល់ខុស ព្រមទាំងការមិនជឿទុកចិត្តចំពោះការមធ្យោបាយពន្យារកំណើតទំនើប។ ឧទាហរណ៍ ជាធម្មតាគេគិតថា ការពន្យារកំណើតទំនើបមិនមានប្រសិទ្ធិភាព អាចបង្កជាហានិភ័យដល់ស្ត្រី និងធ្វើឲ្យស្ត្រីមានការពិបាកក្នុងការមានកូន ទៅថ្ងៃអនាគត។ លើសពីនេះទៅទៀត វាអាចជាការប្រឈមសម្រាប់ប្រជាជនកម្ពុជាក្នុងការពិភាក្សាអំពីមធ្យោបាយពន្យារកំណើត ដោយសារតែវាជាប្រធានបទរសើប ដែលទាក់ទងនឹងការរួមភេទ។ ដោយហេតុនេះហើយ ប្រជាជនកម្ពុជាជាច្រើន មានការស្ទាក់ស្ទើរ ក្នុងការទទួលយកមធ្យោបាយពន្យារកំណើតទំនើប ជាពិសេសនៅតំបន់ជនបទ ដែលអាចនាំឲ្យការមានផ្ទៃពោះដោយមិនបានគ្រោងទុក និងការលំបាកផ្នែកហិរញ្ញវត្ថុដល់គ្រួសារ។
នៅទូទាំងប្រទេសកម្ពុជា ការកើនឡើងនៃការប្រើប្រាស់មធ្យោបាយពន្យារកំណើតទំនើប មានការបោះជំហានទៅមុខយ៉ាងល្អ (ពី៣៩% ក្នុងឆ្នាំ២០១៤ ទៅ៥២% ក្នុងឆ្នាំ២០១៧)។ ទោះជាយ៉ាងណាក៏ដោយ មានក្រុមប្រជាជនខ្លះ បានបង្ហាញអំពីចំនុចខ្វះខាតស្តីពីការប្រើប្រាស់មធ្យោបាយទាំងនេះ ហើយនៅមានការងារច្រើនទៀតដែលយើងត្រូវធ្វើ ដើម្បីធានាបានថាប្រជាជនគ្រប់រូបបានសម្រេចនូវតម្រូវការរបស់ខ្លួនផ្នែកពន្យារកំណើត។
ដើម្បីជួយដោះស្រាយបញ្ហានេះគម្រោងលើកកម្ពស់ឥរិយាបថប្រកបដោយសុខុមាលភាព ដែលឧបត្ថម្ភថវិកាដោយទីភ្នាក់ងារសហរដ្ឋអាមេរិកសំរាប់អភិវឌ្ឍន៍អន្តរជាតិ (USAID) បានបង្កើត និងអនុវត្តអន្តរាគមន៍ផ្លាស់ប្តូរឥរិយាបថបុគ្គលនិងសង្គមដើម្បីសុខភាព ជាមួយអង្គការដៃគូផ្តល់មេត្តា (ភីស៊ី) នៅក្នុងខេត្តកំពង់ឆ្នាំង ដែលចាប់ផ្តើមពីខែកក្កដា ឆ្នាំ២០២០ ដើម្បើបង្កើនចំណេះដឹង ផ្លាស់ប្តូរការយល់ខុស និងបង្កើនការប្រើប្រាស់មធ្យោបាយពន្យារកំណើតបែបទំនើប។ អន្តរាគមន៍នេះគ្របដណ្តប់មណ្ឌលសុខភាពចំនួន៩ ឃុំចំនួន១៣ និងភូមិចំនួន៦៨ នៅស្រុកប្រតិបត្តិចំនួន២។ តាមរយៈការសិក្សាស្រាវជ្រាវ និងទិន្នន័យដែលប្រមូលបាន គម្រោងបានបង្កើតយុទ្ធនាការចំនួន២ គឺយុទ្ធនាការដែលមានឈ្មោះថា “ចំណងស្នេហ៍” និង “អង្គរក្សបេះដូង” ដើម្បី ១) ច្រានចោលនូវការយល់ខុសអំពីមធ្យោបាយពន្យារកំណើតទំនើប ២) លើកទឹកចិត្តឲ្យដៃគូ/ប្តីប្រពន្ធ ពិភាក្សាគ្នាអំពីមធ្យោបាយពន្យារកំណើតទំនើប និងធ្វើការសម្រេចចិត្តរួមគ្នា និង ៣) លើកទឹកចិត្តឲ្យបុរសចាប់ផ្តើមជជែកជាមួយភរិយារបស់ខ្លួនអំពីមធ្យោបាយពន្យារកំណើតទំនើប។
“ចំណងស្នេហ៍” គឺជាយុទ្ធនាការដែលបង្កើតឡើងដើម្បីលើកទឹកចិត្តដៃគូស្នេហា ឲ្យពិភាក្សាអំពីមធ្យោបាយពន្យារកំណើតទំនើប។ គោលបំណងរបស់យុទ្ធនាការនេះគឺដើម្បីផ្តល់នូវព័ត៌មានដែលត្រឹមត្រូវនិងទាន់ពេលវេលា អំពីមធ្យោបាយពន្យារកំណើតនេះ នៅទីកន្លែងដែលសមរម្យ ដែលធ្វើឲ្យមានការពិភាក្សាត្រង់ៗ និងជួយឲ្យដៃគូសម្រេចចិត្តរួមគ្នាដោយយោងទៅតាមព័ត៌មានគ្រប់គ្រាន់។ ដៃគូស្វាមីភរិយាចំនួន៤ទៅ៥គូ ត្រូវបានអញ្ជើញ ដោយអ្នកស្ម័គ្រចិត្តភូមិ ដូចជាមេភូមិ ឬក្រុមទ្រទ្រង់សុខភាពភូមិ (VHSG) ឲ្យចូលរួមក្នុងវគ្គអប់រំពេលល្ងាច ដោយមានភ្នាក់ងារអប់រំរបស់គម្រោង ពីអង្គការភីស៊ី ជួយសម្របសម្រួលការពិភាក្សាស្តីពីការពន្យារកំណើត ដោយបង្ហាញថាការពិភាក្សានេះមានសារៈសំខាន់ដែលជាផ្នែកមួយនៃទំនាក់ទំនងដៃគូប្តីប្រពន្ធដ៏ជិតស្និទ។ នៅក្នុងអំឡុងពេលនៃវគ្គអប់រំនោះ ស្វាមីភរិយាចូលរួមក្នុងសកម្មភាពប្រកបដោយភាពសប្បាយរីករាយ ហើយថែមទាំងអាចស្វែងយល់អំពីមធ្យោបាយពន្យារកំណើតបែបទំនើប និងច្រានចោលការយល់ខុសមួយចំនួនអំពីការពន្យារកំណើតនេះ។
សម្ភារៈផ្សេងៗត្រូវបានបង្កើត និងប្រើប្រាស់នៅក្នុងវគ្គអប់រំសុខភាព ដោយរួមមានវីដេអូដើម្បីបង្ហាញអំពីពាក្យចចាមអារ៉ាមអំពីមធ្យោបាយពន្យារកំណើត, ល្បែង “ពិត មិនពិត” ដើម្បីច្រានចោលព័ត៌មានមិនពិត, “កាតណាត់ជួប” ដើម្បីរំលឹកដល់ដំណើរជីវិតគូស្នេហ៍របស់ពួកគេ, សៀវភៅចំណងស្នេហ៍ សម្រាប់ឲ្យអ្នកចូលរួមយកទៅផ្ទះជាមួយ ដែលមានព័ត៌មានអំពីមធ្យោបាយពន្យារកំណើត រូបភាពនៃផលិតផលពន្យារកំណើត កម្រងសំនួរនិងចំលើយ ព្រមទាំងព័ត៌មានសម្រាប់ទាក់ទងសួរព័ត៌មានបន្ថែម។ ការបង្ហាញរូបភាពផលិតផលពន្យារកំណើតពិតៗ ដូចជាកងដាក់ក្នុងស្បូននិងកងដាក់ក្រោមស្បែក គឺដើម្បីកាត់បន្ថយការភ័យខ្លាតនឹងការប្រើមធ្យោបាយពន្យារកំណើត។
“អង្គរក្សបេះដូង” គឺជាយុទ្ធនាការដែលបានបង្កើតឡើងដើម្បីធ្វើឲ្យមានការចូលរួមពីបុរស ដោយមានការយល់ឃើញថាវាមានភាពងាយស្រួសសម្រាប់បុរសក្នុងការពិភាក្សាអំពីប្រធានបទរសើប ដូចជាការពន្យារកំណើត នៅក្នុងបរិយាកាសដែលមានតែបុរសគ្នាឯង។ ដោយស្រដៀងនឹង “វគ្គក្រុមគូស្នេហ៍” ដែរ បុរសប្រមាណ៨ទៅ១០នាក់ ត្រូវបានអញ្ជើញដោយក្រុមទ្រទ្រង់សុខភាពភូមិ ឲ្យចូលរួមក្នុងវគ្គនោះ ដោយមានការសម្របសម្រួលដោយភ្នាក់ងារអប់រំសុខភាពរបស់គម្រោងដែលជាបុរស។ ក្នុងវគ្គនិមួយ បុរសចែករំលែកបទពិសោធន៍អំពីការពន្យារកំណើត និងក្រុមការងារបានបង្ហាញអំពីជម្រើសនៃមធ្យោបាយពន្យារកំណើត ដើម្បីច្រានចោលនូវការយល់ឃើញខុសអំពីមធ្យោបាយទាំងនេះ។ គោលបំណង គឺដើម្បី លើកទឹកចិត្តឲ្យបុរសពិភាក្សាអំពីជម្រើសមធ្យោបាយពន្យារកំណើតទំនើបជាមួយភរិយារបស់គាត។ ភ្នាក់ងារអប់រំបានប្រគល់បន្តោងសោដែលមានរូបថតនិងព័ត៌មានអំពីមធ្យោបាយទំនើបទាំងនេះ និងមានសារជំរុញថា “ជជែកជាមួយដៃគូរបស់អ្នកអំពីមធ្យោបាយពន្យារកំណើតមួយណាដែលដែលសាកសមនឹងគ្រួសារអ្នក” ។ លើសពីនេះទៅទៀត “ល្បែងអ្នកចាំទី” បានត្រូវរៀបចំឡើងដើម្បីប្រៀបធៀបអ្នកចាំទី (មធ្យោបាយបុរាណ) ដែលមានការជួយពីផ្ទាំងការពារ (មធ្យោបាយទំនើប) មានប្រសិទ្ធិភាពក្នុងការទប់ស្កាត់ការទាត់បាល់ចូល (ការពារមិនឲ្យមានផ្ទៃពោះដោយមិនបានគ្រោងទុក)។
ការចុះតាមផ្ទះត្រូវបានធ្វើឡើងដោយបុគ្គលិករបស់គម្រោងផ្នែក IPC បន្ទាប់ពីបុរសនិងស្ត្រីជាប្តីប្រពន្ធបានចូលរួមក្នុងការវគ្គអប់រំរួចមក ដើម្បីផ្តល់ឲ្យពួកគាត់នូវការពិភាក្សាដែលសមស្របនឹងពួកគាត់ អំពីក្តីបារម្ភ និងសំនួរផ្សេងៗ ព្រមទាំងផ្តល់ឲ្យគាត់នូវព័ត៌មានទំនាក់ទំនងរបស់មណ្ឌលសុខភាព ដើម្បីទទួលបានសេវាពន្យារកំណើតបែបទំនើបដែលជាជម្រើសរបស់គាត់។ លើសពីនេះទៅទៀត ដើម្បីលើកទឹកចិត្តការពិភាក្សាក្រោយសម្រាល បុគ្គលិក IPC របស់យើង ក៏បានចែកចាយស្រោមប័ណ្ណសុខភាពកុមារ ទៅកាន់មណ្ឌលសុខភាពគោលដៅ ដើម្បីឲ្យមណ្ឌលសុខភាពចែកជូនបន្តទៅឲ្យស្ត្រីដែលសម្រាលហើយ អាចរក្សាទុកប័ណ្ណរបស់ខ្លួន នៅពេលគាត់ចេញពីពេទ្យ។ ស្រោមនោះមានលេខ hotline សម្រាប់ឲ្យគាត់ទទួលបានព័ត៌មានបន្ថែម ដែលនេះជាការរំលឹកដល់ស្ត្រីថា គាត់អាចមានផ្ទៃពោះទៀតក្នុងរយៈពេល៤ ទៅ៦សប្តាហ៍ បន្ទាប់ពីសម្រាលហើយ និងលើកទឹកចិត្តឲ្យគាត់ទទួលយកការពន្យារកំណើតបែបទំនើប។
ក្រុមការងារគម្រោងបានចុះសាកសួរទៅកាន់ដៃគូស្វាមីភរិយា នៅក្នុងខេត្តកំពង់ឆ្នាំង កាលពីខែកញ្ញា ឆ្នាំ២០២២ ហើយបានដឹងថាអ្វីដែលជាការលើកទឹកចិត្តទូទៅរបស់ពួកគាត់ គឺបំណងក្នុងការការពារការមានផ្ទៃពោះដែលមិនបានគ្រោងទុក ដើម្បីធានាបាននូវការថែទាំប្រកបដោយគុណភាព ដល់កូនៗរបស់ខ្លួន និងមានចំណូលសមល្មមសម្រាប់គ្រួសាររបស់ពួកគាត់។ លោកស្រីយ៉េន នៅភូមិភូមិក្រាំងស្គារ ខេត្តកំពង់ឆ្នាំង បាននិយាយថា បន្ទាប់ពីគាត់ទទួលបានព័ត៌មានពីបុគ្គលិក IPC មក គាត់និងប្តីរបស់គាត់ បានសម្រេចចិត្តថាការចាក់ថ្នាំពន្យារកំណើតរៀងរាល់៣ខែម្តង គឺជាជម្រើសដ៏ល្អរបស់គាត់។ លោកស្រីបានប្រាប់ឲ្យដឹងទៀតថា ការពន្យារកំណើតបែបទំនើបបានជួយរូបគាត់និងប្តីរបស់គាត់ ឲ្យមានពេល និងធនធានច្រើន ដើម្បីមើលថែកូនរបស់គាត់អាយុ៦ខែ ឈ្មោះមិនា និងធានាថាកូនមិនាមានសុខភាពល្អ។
លោក ឈុំ ពន នៅភូមិចក ខេត្តកំពង់ឆ្នាំង ក៏បាននិយាយផងដែរថា គាត់បានទទួលពត័ត៌មានអំពីមធ្យោបាយពន្យារកំណើតទំនើប ពីលោកគ្រូពេទ្យនៅមណ្ឌលសុខភាព បន្ទាប់ពីបន្ទាប់ពីលោកនិងភរិយាមានកូនដំបូងកាលពី១៣ឆ្នាំមុន ហើយលោកបានប្រើប្រាស់ស្រោមអនាម័យ រហូតដល់ពួកគាត់សម្រេចចិត្តចង់បានកូនទី២ កាលពី៣ឆ្នាំមុន។ គាត់និយាយថា វាមានសារៈសំខាន់ណាស់ដែលត្រូវគិតអំពីការពន្យារកំណើត ដើម្បីធ្វើផែនការកសាងគ្រួសារមួយដ៏ប្រសើរ ដោយមានចំណូលសមល្មម ដើម្បីថែរក្សាកូនទាំង២របស់គាត់។ គាត់ក៏ទទួលបានព័ត៌មានបន្ថែមអំពីការពន្យារកំណើតបែបទំនើប នៅពេលដែលគាត់បានចូលរួមវគ្គអប់រំសម្រាប់បុរស ដែលរៀបចំឡើងដោយគម្រោង PHB ហើយភរិយានិងរូបគាត់ក៏បានសម្រេចចិត្តប្តូរទៅប្រើថ្នាំលេបពន្យារកំណើតវិញ។ ប្រជាជនគោលដៅដែលក្រុមការងាររបស់យើងបានជួបសម្ភាសបាន បានប្រាប់ឲ្យដឹងថា ក្រុមកាងារ IPC របស់យើងរួមនឹងអ្នកស្មគ្រ័ចិត្តភូមិ បានផ្តល់ការគាំទ្រច្រើនដល់ពួកគាត់ ដើម្បី ធានាបានថាពួកគាត់មានចំណេះដឹងដែលត្រឹមត្រូវ ដើម្បីធ្វើការសម្រេចចិត្តជាមួយដៃគូរបស់ខ្លួន និងដើម្បីតម្រូវការក្នុងការពន្យារកំណើតត្រូវបានបំពេញ។
ទោះជាយ៉ាងណា ក៏នៅមានការប្រឈមខ្លះៗផងដែរ។ ប្រជាជនដែលក្រុមការងារបានចុះជួបសម្ភាសបានប្រាប់ឲ្យដឹងថា ការពន្យារកំណើតគឺជាប្រធានបទរសើប ហើយពួកគាត់មិនសូវស្រួលចិត្តក្នុងការពិភាក្សាអំពីប្រធានបទនេះក្រៅពីប្តីប្រពន្ធគាត់ឡើង។ ការសិក្សាស្ទង់មតិមួយក៏បានរកឃើញបញ្ហាដូចគ្នានេះដែរ ដោយលទ្ធផលបានបង្ហាញថា ក្រុមគោលដៅ៥០,៦ភាគរយ បានពិភាក្សាអំពីផលប៉ះពាល់ និងក្តីបារម្ភរបស់គាត់ជាមួយដៃគូរបស់គាត់ ហើយ ៣៦,៧ ភាគរយបានពិភាក្សាជាមួយអ្នកផ្តល់សេវាសុខភាពសាធារណៈ ហើយ២៩,១ភាគរយ បានពិភាក្សាជាមួយសមាជិកគ្រួសារ។ នេះបញ្ជាក់អំពីសារៈសំខាន់ នៃសកម្មភាពរបស់គម្រោង PHB ដែលបន្តការជួយគាំទ្រ និងចំណេះដឹង ដល់ដៃគូ ដែលនឹងជួយសម្របសម្រួលការពិភាក្សា និងការសម្រេចចិត្ត។ លើសពីនេះទៅទៀត បុគ្គលិកគម្រោង និងអ្នកស្ម័គ្រចិត្តភូមិ មានការពិបាកក្នុងការអញ្ជើញប្រជាជនគោលដៅឲ្យចូលរួមក្នុងវគ្គអប់រំ ដោយសារតែពួកគាត់ម្នាក់ៗមានការវល់ក្នុងការងារផ្សេងៗ។ លោកវណ្ណា ដែលជាបុគ្គលិកផ្នែក IPC បាននិយាយថា វាមានការពិបាកក្នុងការប្រមូលបុរស ៨ទៅ១០នាក់ ឲ្យមកចូលរួមក្នុងវគ្គអប់រំសម្រាប់បុរស។
ដើម្បីដោះស្រាយបញ្ហានេះ លោកវណ្ណា បានរៀបចំវគ្គអប់រំចំនួន២ពេល (គឺមួយនៅពេលព្រឹក និងមួយទៀតនៅពេលរសៀល) ដោយមានអ្នកចូលរួមតិចជាងមុន (៥នាក់ក្នុងវគ្គនិមួយៗ) ដោយប្រើប្រាស់ថវិកា។ យោងទៅតាម លោកវណ្ណា ការរៀបចំជាក្រុមតូច មានភាពងាយស្រួលក្នុងការអញ្ជើញអ្នកចូលរួម ហើយការធ្វើដូចច្នេះធ្វើឲ្យកម្មវិធីប្រព្រឹត្តទៅបានយ៉ាងរលូន។ ជួនកាល ក្នុងអំឡុងពេលរដូវកាលដែលមានពិធីមង្គលការច្រើន គាត់សុខចិត្តធ្វើដំណើរទៅជួបអ្នកចូលរួមដើម្បីធ្វើវគ្គអប់រំនេះ។
ពីខែកក្កដា ឆ្នាំ២០២០ ទៅខែកញ្ញា ឆ្នាំ២០២១ ក្រុមការងារ PHB បានរៀបចំវគ្គអប់រំចំនួន១ ៧៨០ វគ្គ (១ ៣៤៦ ជាវគ្គគូរស្នេហ៍ និង៤៣៤ ជាវគ្គបុរស) ហើយមានអ្នកចូលរួមចំនួន ១៨ ៥៥០ នាក់ ។ លទ្ធផលពីការធ្វើការវាយតម្លៃមុន និងក្រោយកម្មវិធីបានបង្ហាញថា ការព្រួយបារម្ភអំពីផលប៉ះពាល់នៃមធ្យោបាយពន្យារកំណើតបែបទំនើប នៅតែមានច្រើននៅឡើយ គឺ៦៥,៣% នៃប្រជាជនគោលដៅ ក្នុងពេលវាយតម្លៃមុនកម្មវិធី និង ៦៣,៣% ក្នុងពេលវាយតម្លៃក្រោយកម្មវិធី ។ ទោះជាយ៉ាងណាក៏ដោយ ក៏នេះបញ្ជាក់អំពីការធ្វើឲ្យប្រសើរជាងមុន ក្នុងការច្រានចោលការយល់ខុស ស្តីពីការដែលមធ្យោបាយពន្យារកំណើតមានផលប៉ះពាល់ដល់ការមានផ្ទៃពោះក្នុងថ្ងៃអនាគត ដោយមានប្រជាជនគោលដៅចំនួន ៣៣,៥% បានជឿដូចច្នេះ នៅក្នុងការវាយតម្លៃមុនកម្មវិធី ហើយត្រឹមតែ ២១,៨% នៅក្នុងការវាយតម្លៃក្រោយកម្មវិធី។ លើសពីនេះទៅទៀត លទ្ធផលបានបង្ហាញ អំពីភាពជោគជ័យ ក្នុងការកាត់បន្ថយការយល់ខុស ទាក់ទងនឹងប្រសិទ្ធិភាពនៃមធ្យោបាយពន្យារកំណើតបែបទំនើប ដោយប្រជាជនគោលដៅចំនួន ៣១,៨% ជឿថាមធ្យោបាយពន្យារកំណើតបែបទំនើបមានប្រសិទ្ធិភាពក្នុងការការពារមិនឲ្យមានផ្ទៃពោះ នៅក្នុងពេលវាយតម្លៃមុនកម្មវិធី ហើយ៩៤,៤% ជឿដូចច្នេះ នៅពេលវាយតម្លៃក្រោយកម្មវិធី ។ ភាពជោគជ័យបន្តទៀត គឺប្រជាជនគោលដៅចំនួន ៩១,១% ដែលបានពិភាក្សារអំពីមធ្យោបាយពន្យារកំណើតបែបទំនើបជាមួយដៃគូររបស់ខ្លួន នៅក្នុងអំឡុងពេល៦ខែចុងក្រោយ ក៏បានប្រើប្រាស់មធ្យោបាយនេះផងដែរ។ មធ្យោបាយដែលមានប្រសិទ្ទិភាពជាងគេ គឺថ្នាំលេបពន្យារកំណើត (៤៨,៦%) ថ្នាំចាក់ (៣០,៣%) ក្នុងដាក់ក្នុងស្បូន (១៨,៣%) កងដាក់ក្រោមស្បែក (១៧,១%) និងស្រោមអនាម័យបុរស (១៣,៧%)។
សម្រាប់សម្ភាររបស់កម្មវិធីវិញ ការវាយតម្លៃក្រោយកម្មវិធីបានបង្ហាញថា សៀវភៅអប់រំចំណងស្នេហ៍ (៨៤,៨%) ការបង្ហាញផលិតផលពន្យារកំណើតពិត (៦៦,៤%) និងវីដេអូស្តីពីការពន្យារកំណើត (32%) គឺជាសម្ភារៈ ដែលប្រជាជនគោលដៅអាចរំលឹកច្រើនជាងគេ។
នៅពេលដែលសួរថាតើអ្វីដែលធ្វើឲ្យបទអន្តរាគមន៍ដំណើរការបានល្អ ក្រុមការងារផ្នែកអប់រំសុខភាពរបស់គម្រោង អ្នកស្ម័គ្រចិត្ត និងប្រជាជនគោលដៅបានឆ្លើយថា ប្តីប្រពន្ធ និងបុរសជាច្រើន បានដឹងអំពីជម្រើសនៃមធ្យោបាយពន្យារកំណើតបែបទំនើប មុននឹងបានចូលរួមជាមួយកម្មវិធី ប៉ុន្តែនៅមានការខ្វះខាតក្នុងការយល់ និងចំណេះដឹងដែលត្រឹមត្រូវ អំពីជម្រើសនិមួយៗ។ ដោយកម្មវិធីបានផ្តល់ឲ្យគាត់នូវចំណេះដឹងលម្អិត ប្តីប្រពន្ធ អាចពិភាក្សាគ្នា និងធ្វើការសម្រេចចិត្តដោយមានចំណេះដឹងគ្រប់គ្រាន់។ ឧទាហរណ៍ កងដាក់ក្រោមស្បែកសាកសមសម្រាប់ការពន្យារកំណើតរយៈពេលយូរ និងការលេបថ្នាំ គឺសាកសមនឹងរយៈពេលខ្លី។ អ្វីដែលធ្វើឲ្យកម្មវិធីនេះជោគជ័យ គឺចំណេះដឹងដែលប្រជាជនទទួលបាន។ ការការពារការមានផ្ទៃពោះដែលមានបានគ្រោងទុក អាចធ្វើឲ្យគ្រួសារផ្តោតទៅលើពេលវេលា និងថាមពល ក្នុងការចាប់យកផែនការជីវិតផ្សេងទៀត និងដើម្បីមានជីវភាពប្រកបដោយគុណភាព សម្រាប់គ្រួសារទាំងមូល។